Sekretariu Estadu Obras Publiku, Luis Vaz Rodrigues, hateten projetu ke’e bee dalan iha area Colmera ne’e sala, tanba tuir tekniku bee dalan nunka ke’e iha estrada klaran.
“Ita tenke hare ninia redasaun tanba be’e ne’e sei ba tasi,tasi ne’e mak as liu ka saluran ne’e mak as liu,” Sekretariu Estadu Obras Publika (SEOP), Luis Vaz Rodrigues hateten, iha Parlamentu Nasional.
Rodrigues hateten kee bee dalan iha Colmera ne’e lalos, tanba tasi mak as liu fali bee dalan. “Ita hare to’ok,” nia dehan.
Entretantu membru Komisaun E (infra-estrutura, transportes no komunikasaun), Deputadu Paulino Monteiro, hateten tempu udan bo’ot tasi sei sa’e iha area Colmera nian, tanba bee dalan ne’e tun liu.
“Uluk ita hare iha 1972 tasi tama iha Dili laran sa’e to’o tetuk hotu,” Deputadu Monteiro dehan.
Nia dehan, agora dadaun tasi komesa as, tanba bainhira udan mota tun lori rai iha foho leten tun hotu ba tasi.
“Ita laiha makina ida atu suru hanesan uluk Portugues nia tempu suru rai iha tasi tau fali ba iha rai maran,”nia dehan.
Tuir ema tekniku sira nia hare, katak kada tinan uma iha Dili laran mout tun sentimetru rua (2cm).
Tanba ne’e nia sujere tenke suru rai nafatin ba iha klean sira atu nune’e rai as nafatin.
Iha sorin seluk Vise Prezidente Komisaun E, Deputadu Inacio Moreira, lamentavel tanba projetu ne’e SEOP mak foti desizaun, maibe to’o ikus sira kritika fali sei ameasadu iha tempu udan.
“Ami deputadu labele halo esplikasaun kona ba tekniku ninian, imi mak halo dezenu,imi mak halo desizaun, ikus mai hateten tan fali ameasadu,” Deputadu Moreira lamenta.
Deputadu ne’e hateten, bainhira Komisaun E halo fiskalizasaun ba iha fatin ne’eba, kontraktor no Ministru Obras Publiku, garante katak obra ne’e dura to’o 20 anos.
“Maibe hau hein la to’o tan tinan 20 mak bee ruma sa’e fali iha Colmera, sira tenke toma responsabilidade,” nia sujere.
Kona ba SEOP dehan projetu ne’e sala, nia husu ba SEOP atu klarifika lolos ba implementasaun projetu ne’e, se mak haruka?.
“Ami foin deskobre katak sasan sira ne’ebe sira halo ne’e la tuir planu,la halo estudus antes halo obra sira ne’e,” nia hateten.
Enkuantu total orsamentu ba obra ne’e hamutuk $1 miliaun resin.
