Orsamentu Jeral Estadu (OJE) ba anu fiscal 2014 governu propoin $26,9 miloens ba programa merenda eskolar iha eskola hotu (ensino baziku) iha rai laran.
Primeiru Ministru (PM), Kay Rala Xanana Gusmao, hateten alokasaun orsamentu ida ne’e ho intensaun oinsa bele asegura ekilibriu nutrisaun ne’ebe diak ba labarik sira.
“Parte ida buka mantein ita nia labarik sira iha eskola no husi parte seluk bele asegura ekilibriu nutrisional ne’ebe diak liu ba labarik sira hodi nune’e bele kombate malnutrisaun,” PM Gusmao hateten, iha diskusaun OJE 2014, iha Parlamentu Nasional.
Iha fatin hanesan membru Komisaun F (edukasaun, saude, kultura, veteranus no igualidade jeneru) Deputadu Eladio Faculto, hateten programa merenda eskolar durante ne’e la’o ladun efetivu iha eskola sira, tanba jestaun la diak.
Nia dehan, orsamentu ba merenda eskolar ba tinan kotuk ninian $0,15 sentavus, maibe ba tinan ne’e, sa’e ba $0,25 sentavus.
Tuir nia, osan sa’e ne’e diak ona, maibe fatin atu tau fos mak laiha, e durante ne’e tau deit iha eskola sira.
“Ami hare akontese ida ne’e mak iha Lospalos mosu ema uja veneno hodi halo kontaminasaun alimentar ba labarik sira,” Deputadu Faculto hateten.
Iha fatin hanesan Prezidente Komisaun F, Deputadu Virgilio Hornai, hateten alokasaun orsamentu ba tinan ida ne’e la’os deit ba setor edukasaun, maibe mos setor hotu presiza halo dezenvolvementu.
“Ita infrenta problema hanesan estrada, bee moos, eletrisidade, edukasaun, saude inklui asistensia sosiais mos sei problema,” Deputadu Hornai hateten.
Hornai hateten, orsamentu ba Minietriu Edukasuan kada tinan sempre sa’e, hanesan tinan ne’e sa’e pursentu 15 (15%), ne’ebe sei tau matan ba area infraestrutura inklui fasilidades eskola nian.
