Membru Parlamentu Nasional lamentavel ho passaporte Timor-Leste ne’ebe to’o agora seidauk tuir estandar internasional, tanba ne’e husu ba Ministeriu Justisa atu bele hare ba kestaun ne’e.
Deputada Ilda Maria da Conceicao, hateten passaporte ne’ebe agora ne’e seidauk estandar internasional, tanba iha membru Parlamentu balun bainhira halo viajen ba rai liur, dala ruma hetan atrazu iha aero portu.
“Iha nasaun balun ke la rekonese ita nia passaport, tanba seidauk estandariza,” Deputada da Conceicao kestiona, iha Parlamentu Nasional.
Nia hatutan, kestaun ne’e dala ruma halo deputadu sira tenke hetan tahan iha airport ne’ebe lori tempu kleur no atraza tebes viazen.
“Kada ves buka to’o oras ba oras iha aero portu nia laran, para oinsa fo liu ita nia membrus sira ne’e,” nia dehan.
Tanba ne’e husu ba Ministeriu Justisa atu bele hare ba kestaun ne’e, la’os deit deputadu sira mak ba rai liur, maibe membru governu barak mos dala ruma halo viajen ba nasaun-nasaun.
“Presiza muda sistema passaporte sai nivel internasional, para deputadus no membru governu sira viajen ba liur karik labele iha impedementu iha airport internasional,” nia sujere.
Hatan ba kestaun ne’e Ministru Justisa, Dionisio Babo Soares, hateten problema ida ne’e sira hatene no iha tinan ida ne’e ministeriu sei hadia ida ne’e.
“Depois de orsamentu aprova, ami sei hadia kestaun passaporte ne’e,” Ministru Soares dehan.
