Ministeriu Justisa iha ona planu no sei estabelese klinika judisiariu iha 13 distritus, nune’e bele fasilita komunidade sira bele hatene liu tan kona ba lei ruma.
Ministru Justisa, Dionisio Babo Soares, hateten klinika ne’e ho objetivu atu fasilita komunidades hasa’e liu tan sira nia konesementu kona ba leis ne’ebe vigor iha rai laran.
“Klinika judisiariu ne’e tau hanesan fatin ida iha ne’eba, nune’e bainhira povu balun hakarak halo konsultasaun kona ba leis, sir abele mai iha klinika ne’e,” Ministru Soares hateten, iha Parlamentu Nasional.
Nia dehan, durante ne’e governu ba halo sosializasaun kona ba leis ba iha komunidades loron ida ka rua deit, e ida ne’e la sufsiente atu sira bele komprende ho diak.
“Sira bele mai iha klinika ne’e hodi hetan esplikasaun klaru kona ba lei ruma, duke sira mai iha Dili do’ok,” nia dehan.
Nia dehan, ministeriu sei aranja ema tekniku judisiariu inklui estudantes husi fakuldade direitu ne’ebe hatene esplika lei ba komunidade iha klinika ne’e no iha konesementu tebes kona ba lei sira.
Kona ba fundus, nia dehan, governu sei buka fundus husi parseiru internasional sira.
“Ami sei buka osan liu-liu osan husi liur, husi parseiru internasional sira,” Ministru Soares dehan.
Iha parte seluk Prezidente Komisaun A (konstituisaun, justisa, administrasaun publiku, poder local no anti korupsaun), Deputada Carmelita Caetano Moniz, apoia tebes inisiativa ida ne’e, tanba ne’e ba interese povu nian.
“Ne’e hanoin ne’ebe diak, no espera katak ho prezensa klinika judisiariu ne’e, komunidade sira bele komprende diak liu tan kona ba lei sira ne’ebe iha,” Deputada Moniz hateten.
