Pesoal Forensic Ospital Nasional Guido Valadares, Filomena (lakohi fo naran kompletu), hateten oras ne’e dadaun iha mate isin nain lima mak rai hela iha mortuario no seidauk bele halo autopsia, tanba medikus laiha.
Nia dehan, durante feriadu loron Natal no tinan foun, forensia Ospital Nasional Guido Valadares (HNGV) simu mate isin nain hitu, Timor oan nain lima (omesidu) no nain rua seluk ema estranjeiru.
Kona ba mate isin nain rua (Philipina no Amerika), nia dehan agora dadaun iha ona prosesu desloka ba sira nia rain, tanba sira mate normal, la ho kazu.
“Mate isin sira ne’e seidauk halo autopsia, tanba doutora sei pasa ferias iha rai liur, doutora Cubano,” Pesoal Forensika Filomena dehan, iha Bidau, Dili.
Kona ba Mediku Forensika, nia informa, Timor –Leste iha ona medikus nain rua mak tuir ona formasaun ba area refere, maibe labele halo buat ida, tanba la’os medikus espesialista ba area ida ne’e.
Entretantu Administrador HNGV, Francisco Pereira do Rego, rekonese katak mate isin sira ne’e rai kleur ona no nia promete sei kontaktu ba brigada Cuba ne’ebe dadaun ne’e sei pasa ferias iha Cuba.
“Hau la hatene bainhira mak fila, tanba nia foti lisensa annual, maibe ami sei kontaktu ho brigade,” Administrador Rego dehan.
Tanba ne’e nia rekomenda ba Ministerio Saude atu fo atensaun no prioridade ba medikus Timor oan nain rua ne’ebe iha ona konesementu kona ba area ne’e, kompleta tan sira nia kursu, nune’e labele tabele ba ema husi nasaun seluk.
Enkuantu bainhira Jornalista TDW koko konfirma kestaun ne’e ba iha Ministru Saude, Sergio da Costa Lobo, maibe nia rezeita fo komentario kona ba asuntu ne’e.
