Sekretariu Estado Politika Formasaun Profesional e Empregu (SEPFOPE) no Sekretario Estado Peskas sei loke sentru treinamentu peskas iha Maubara hodi prepara foinsa’e sira iha area maritima. 
Sekretariu Estado Peskas, Rafael Pereira Gonçalves, hateten objetivu husi estabelesementu sentru treinamentu ne’e, atu responde ba iha politika governu Timor –Leste ne’ebe haruka trabalhador sira ba iha Korea do Sul.
Nia hateten, trabalhador Timor oan ne’ebe durante ne’e ba iha Korea do Sul 75% mak servisu iha area peskas, maibe barak mak laiha konesementu kona ba peskas.
“Ami sente, presiza duni estabelese sentru treinamentu ne’e, nune’e sira ba ne’e iha ona konesementu hakiak ikan, servisu kaer ikan iha tasi e sira labele hakfodak ho buat hotu,” SE Gonçalves dehan, iha Comoro, Dili.
Nia hatutan, programa hasa’e kapasitasaun ne’e hetan apoiu fundus husi Korean Internasional Cooperation of Agency (KOICA) ho montante $6 miloens ba tinan 2014 to’o 2017 espesifiku ba area peskas.
Entretantu, Sekretariu Estado Politika Formasaun Profesional e Empregu (SEPFOPE), Ilidio da Costa Ximenes, prontu atu kolabora ho Sekretario Estado Peskas fo formasaun ba foinsa’e sira espesifiku iha area maritima nian.
“Maibe konstrusaun sentru ami bele, ne’e sekretario estado peskas mak hare, ami so apoia iha formasaun,” SE Ximenes dehan.
Nia hateten, kapasitasaun ne’e la’os deit atu ba servisu iha Korea do Sul, maibe prepara mos foinsa’e sira ne’ebe iha rai laran nune’e sira ne’ebe iha Korea kontratu hotu fila mai Timor –Leste sira bele kopera hamutuk hodi halo buat ruma, sustenta sira nia moris no kontribui ba nasaun.
