Sekretaria Estadu Arte no Kultura iha ona planu atu loke sentru formasaun arte no kultura iha Dili, nune’e bele kapasita diak liu tan ema ne’ebe iha talentu kona ba arte no kultura ninian.
“Imi hatene foin fulan kotuk liu ba ami fo esplikasaun no sosializasaun atu harii biblioteka sentru kultural iha Hudi laran,” Cecilia Assis, Diretora Jeral iha Sekertaria Estadu Arte no Kultura (SEAK), iha Sentru Konvensaun, Dili.
Assis hateten, rai atu harii sentru formasaun no biblioteka ne’e entrega husi Ministeriu Justisa liu husi Sekretariu Estadu Terras no Propriedade .
Nia dehan, medida ba rai ne’e 27,000 meter persegi iha Hudi laran ne’ebe pagar haleu tiha ona no planu ba oin se alarga tan akademia arte kultural ninian iha fatin ne’eba.
“Ami nia biblioteka no sentru kultural ida ne’e iha doador ida mak fo apoiu governu husi kompanha ida ne’ebe mak halo eksplorasaun mina iha tasi Timor ,”Assis esplika
Diretora ne’e akresenta, katak kompania ne’e naran ENI ne’ebe mak fo ona nia komprimisiu sosial ba Timor-Leste ho apoiu osan montante $10 milioens.
Orsamentu ne’e, nia dehan, atu harii uma inklui sosa material hanesan komputador,armariu,kadeira no meja.
Tuir planu kompania ida sei tun ba halo estudu geolojiku kona ba rai ne’e, depois mak tekniku sira halo dezenu ba biblioteka no loke konkursu ba konstrusaun.
Iha fatin hanesan Sekertaria Estadu Arte no Kultura, Maria Isabel de Jesus Ximenes, hateten kultura hanesan objetu turistiku ne’ebe mak tenke kaer nafatin.
“Ema barak mos koalia ho ami, katak ita la halo ita nia kultura bele lakon,” Ximenes dehan.
Nia garante katak, kultura tradisional Timor-Leste nian sei la lakon tanba tinan -tinan promove nafatin.
Entretantu Eka Freitas da Costa, grupu dansa tradisional husi distritu Baucau, hateten Sentru Formasaun Arte no Kultura ne’e importante tebes, atu oinsa mak joventude sira ne’ebe mak iha talentu iha arte no kultura bele kapasita sira nian an diak liutan.
“Hau nia hanoin meus ida ne’e importante mos ba ami grupu tradisional sira oinsa mak ami bele aprende diak liutan ami nia talentu sira ne’e,” da Costa dehan.
Nia mos husu ba governu atu aselera lalais prosesu ne’e atu nune’e sira bele hetan oportunidade ida ne’e.
“Ami husi Baucau dalabarak ona tuir festival hanesan ne’e no hetan juara dalabarak mos, maibe ami nia konesementu sei limitadu,” nia dehan.
