Premiada N-Peace tinan 2013, Madalena Bidau Soares alias Mana Kasian, husu ba foinsa’e Timor oan feto no mane atu fo importansia ba edukasaun no hado’ok an husi violensia, tanba nasaun ne’e sei presiza ema atu defende. 
Nia hato’o sujestaun ida ne’e, tanba oras ne’e dadaun foinsa’e barak mak ladun fo importansia ba edukasaun, maibe fo liu atensaun ba iha asuntu particular sira ne’ebe prejudika sira nia moris.
“Hau hakarak koalia hanesan ne’e foinsa’e feto no mane ba eskola, karik hanoin liu –liu edukasaun estuda maka’as, bele rega malu ho telephone, maibe besik malu labele aplika violensia balun ne’ebe prejudika inan feton sira nia moris,” Premiada Kasian sujere, liu husi konferensia imprensa ne’ebe hala’o iha edifisiu Fongtil, Kaikoli, Dili.
Premiada ne’e mos sente preokupa tebes ho labarik sira ne’ebe husik hela sira nia estudu, involve iha kazu violensia ruma hodi tama komarka ho idade ne’ebe ki’ik.
Nia hatutan, iha foinsa’e feto no mane barak mak komesa la respeita malu no la hadomi malu ona, ataka malu to’o rezulta balun mate.
Hanoin ne’ebe hanesan mai husi Premiada N-Peace 2011, Filomena Barros dos Reis, no husu ba entidades hotu liu –liu foinsa’e sira atu labele mete violensia, maibe sai foinsa’e ne’ebe produtivu no kreativu hodi preenxe demokrasia ida ne’e, tanba foinsa’e mak futuru ba nasaun.
“La fasil atu muda ema nia karakter, maibe ho pasensia hau kalan –kalan la’o ba mai Dili laran,koalia ho foinsa’e sira ne’ebe tur estrada, hemu tua, fai biliar koko koalia ho sira, katak ida ne’e la diak, tenke prepara an,” nia dehan.
Nia hatutan, katak oras ne’e dadaun oportunidade diak ba foinsa’ e sira atu prepara an didiak hodi bele dezenvolve rai ida ne’e ba oin, tanba nasaun ne’e presiza ema matenek.
