Vise Primeiru Ministru, Fernando Lasama de Araujo husu ba Ministeriu Saude atu haforsa servisu sentru saude sira, fo atendementu ba moras sira ne’ebe presiza tulun.
Vise Lasama dehan, durante ne’e pesoal saude sira iha sala emergensia Ospital Nasional Guido Valadares (HNGV) sempre komplein, tanba moras bai-bain deit mos mai iha emergensia hotu.
“Nune’e labele prejudika fali atendementu servisu iha ospital, tanba barak liu moras sira ne’ebe lolos atende iha sentru saude hanesan isin manas, mear, kabun moras no seluk tan,” Vise Lasama dehan, iha Bidau, Dili.
Nia dehan, ida ne’e akontese tanba problema jestaun, tanba ne’e importante tebes atu identifika problema no halo intervensaun hodi fortifika servisu no fasilidade iha sentru saude no ospital referral sira hotu atu fo atendementu ba pasiente sira.
“Hau hanoin dr. Sergio ho ekipa sira tenke buka dalan atu hamosu fasilidade no haforsa servisu sentru saude sira no ospital referral sira, nune’e buat hotu labele refere deit mai ospital nasional, ne’e problema ne’ebe ita atu hare,” Vise Lasama sujere.
Entretantu Diretor Klinika HNGV, Aniceto Barreto, hateten komunidade barak seidauk komprende servisu emergensia, presiza fo edukasaun no habelar informasaun ba komunidade hotu.
“Atu sira komprende funsaun emergensia no fortifika servisu sentru saude sira hotu,” Diretor Bareto dehan.
Hatan ba kestaun ne’e Ministru Saude, Sergio da Costa Lobo, katak dadaun ne’e sira halo hela avaliasaun ida hodi hadia jestaun funsionamentu sentru saude sira hotu iha Dili laran.
“Agora ami hadia hela fasilidades iha sentru saude, atu sira bele loke 24 oras hodi fo atendementu ba komunidade sira,” Ministru Lobo dehan.
Nia dehan, planu ida ne’e hahu la’o iha distritu Dili, redus numeru pasiente ne’ebe la merese tama iha ospital nasional bele ba sentru saude, nune’e bele hadia fasilidade ospital nasional.
