Ministeriu Agrikultura no Peskas (MAP) sei aloka $100,000 husi Orsamentu Jeral do Estadu (OJE) 2014 hodi kuda marungi iha kanteirus, tanba iha nutrisaun diak ba saude labarik.
Ministru Mariano Assanami Sabino, dehan marungi tahan no fuan iha nasaun Africa ema uja hasa’e nutrisaun ba ema nia saude, liu –liu labarik sira, tanba ne’e tinan ida ne’e Timor-Leste mos mobiliza kuda marungi no redus numeru mal nutrisaun iha rai laran.
“Ita bele uja rai mamuk ne’ebe iha hodi kuda marungi, labele husik mamuk deit tanba marungi ne’e nia tahan no nia fuan fo nutrisaun diak ba ita,” Ministru Asanami dehan, iha selebrasaun loron mundial aihan iha Sentru Konvensaun, Dili.
Iha tinan 2014, nia dehan movimentu kuda marungi sai mos programa prioridade MAP nian, enkoraja komunidade sira kuda marungi iha kantreiru uma oin, iha eskola hodi asegura sustentabilidade merenda eskolar nian.
Entretantu reprezentante Organizasaun Saude Mundial (WHO) iha Timor-Leste, Doutor Jorge Luna, dehan marungi iha nia funsaun barak tebes, kontribui mos ba redusasun mal nutrisaun, tanba marungi nia tahan fo nutrisaun ne’ebe diak ba ema nia saude liu –liu labarik sira kompara ho modo sira seluk.
Marungi nia tahan bele fo 20-25% protein, calcium, vitamina A, vitamina C, Vitamina E ba ema nia isin kompara ho modo sira seluk hanesan senhora, mantolu, inklui mos susbeen no ikan.
“Marungi tahan alem de kahur tomak ba iha hahan ne’ebe ema han liu –liu sasoro ba labarik sira, mos bele halo maran no dulas uut uja ba hahan sira ne’ebe atu konsume lor-loron,” Doutor Luna dehan.
Alem de ne’e nia afirma, marungi mos iha funsaun seluk hanesan nia tahan bele halo adubu, han, aimoruk no nia abut bele halo aimoruk, kulit no ai bele halo tali, surat tahan, aimoruk inklui mos nia funan no fuan, tanba ne’e presiza duni mobiliza kuda marungi.
Marungi mos bele kura moras oi-oin hanesan diarea, mear, tee been, asma, ISPA, liman ain sin, jerawat no moras sira seluk tan.
Iha parte seluk membru Komisaun D (ekonomia no dezenvolvimentu, Deputada Josefa Alvares Soares Pereira, dezafia programa ne’e tanba MAP durante ne’e iha programa bar-barak maibe programa sira ne’e la sustentavel.
“Ladun fo moris ba povu. Atu halo diversidade aihan ne’e la’os kuda buat sira hanesan ne’e, maibe importante aumenta produsaun ba ema atu han hodi moris no halo esportasaun,” Deputada Pereira dehan.
Moringa Oleifera ka Marungi ai ida ne’ebe moris lalais to 10 metro iha klima moderado ka manas hanesan iha Timor-Leste. Marungi bele moris iha area ne’ebe be la barak mos. Marungi bele moris iha rai ne’ebe ba dun diak hanesan rai maran ka iha rai-henek leten. Maibe kualidade rai diak mos sei halo ai-tahan Marungi nia nutrisaun diak liu tan.
