Diretora East Timor Development Agency (ETDA), Palmira Pires, hateten sentru formasaun turismu no otelaria prontu ona atu fo kapasitasaun nivel internasional ba foinsa’e sira iha area rua ne’e hodi hola parte iha prosesu dezenvolvementu. 
Nia dehan, ETDA nudar parseirus governu hakarak focus fo formasaun no kapasita foinsa’e sira iha area turismu no otelaria ho estandarte ne’ebe kualifikadu, tanba Timor –Leste iha potensialidade ba setor rua ne’e.
“Ita hare prioridade no nesesidade barak, maibe hau hanoin buat ne’ebe mak ita bele asegura ita nia future, mak eduka no fo formasaun ba ita nia ema tanba ita labele harii nasaun ida sein ema ne’ebe iha formasaun no skill,” Diretora ETDA, Palmira Pires dehan, iha serimonia inagurasaun edifisiu sentru formasaun turismu no otelaria, iha Hudi laran, Dili.
Nia hatutan, sentru ne’e iha fasilidade no ekipamentus kompletu ne’ebe kualidade no treinador peritu sira husi nasional no internasional.
Nia informa, katak kuantidade sentru formasaun foun ne’e sei akomoda deit foinsa’e sira hamutuk 250 resin husi 13 distritus hodi aprende klean liu tan kona ba servisu Turismu no otelaria hodi bele investe iha futuru.
Enkuantu Ministru Turismu, Francisco Kalbuady Lay, apresia tebes ho inisiativa ne’ebe organizasaun ne’e iha atu forma foinsa’e sira iha area turismu no otelaria no promete sei apoia nafatin intermus moral no finanseirus.
“Hau hanoin ministerio turismu agora iha sorte bo’ot tanba iha organizasaun ida ne’ebe makas no matenek hanesan ne’e, hau mos sei apoiu nafatin ba ita bo’ot tanba hau hanoin katak sentru ne’e importante tebes ba ita nia futuru liu –liu iha industri turismu nian,” promete Ministru Lay.
Entretantu, Sekretariu Estadu Politika Formasaun Profesional e Empregu (SEPFOPE), Ilidio da Costa, husu ba sentru formasaun ETDA atu kolabora nafatin ho SEPFOPE liu –liu INDIMO hodi hetan akreditasaun tanba iha area balun mak seidauk hetan akreditasaun.
“Parabens ba ETDA maibe keta haluhan halo kordenasaun ho INDIMO atu hetan akreditasaun tanba ita ba ona iha rai liur sertifikadu ne’e importante atu hatudu katak ema ne’e kualifikadu duni,” SE da Costa dehan.
Nia hatutan, kordenasaun ho INDIMO ne’e importante tebes atu bele hamutuk hodi hare ba curriculum ne’ebe organizasaun iha nune’e bele hanorin estudantes sira mos tuir duni curriculum ne’ebe iha.
Sentru Formasaun ne’e kompleta kedas ho bar, restorante, dapur komersiu, sala konferensia no dormitorio ba ema nian 40.
Dormitoriu ne’e sei uja husi estudantes husi distritus ne’ebe hahu harii iha 2012 ho orsamentu husi IV governu liu husi Ministeriu Turismu Komersio Industria (MTCI) ho $394,260 no ETDA $83,780, total $ 478,040.
Obra ne’e hala’o husi kompania local Nevan Construction inklui mos instalasaun ba ekipamentus dapur, bar, restaurant no dormitorio.
