Motorista nain 40 tama sela polisia nian durante 72 oras, tanba lori motor laiha karta kondusaun (SIM= Surat Izin Mengemudi).
Ema nain 40 ne’e identifika bainhira Polisia Nasional Tranzito (POLTRANS) halo operasaun check point iha Dili laran foin lalais.
Komandante Nasional Unidade Tranzito, Inspector Xefe Antonio L.C. Soares, hateten iha lei artigu 207 Kodigu Penal, hatuur ona katak, kriminaliza ba ema sira ne’ebe laiha karta kondusaun.
“Tanba ne’e primeiru ami tahan tiha sira iha sela polisia durante 72 oras, depois hearing no hotu tiha ba tuir prosesu julgamentu iha tribunal,” Komandante Soares hateten, iha Kaikoli, Dili.
Nia esplika, depois ida ne’e durante fulan neen (6) nia laran ema sira ne’e labele lori motor no tenke trata sira nia karta kondusaun (SIM).
“Kuandu hetan fali lori motor no nafatin laiha karta kondusaun, entaun la’os ona 72 oras iha sela, maibe pena prizaun durante tinan rua,” Komandante Soares katak.
Nia informa, agora dadaun 40 pessoas ne’e sei tuir hela proseu judicial nian, no balun livre ona no trata dadaun ona sira nia karta kondusaun.
Iha fatin seluk Deputada Ilda Maria da Conceicao, hateten POLTRANS halo asaun bazea ba lei, maibe kona ba atu hatama ema na kadeia durante tinan rua tanba deit laiha karta kondusaun, presiza hare didiak.
“Ezemplu estudantes mak halo hanesan ne’e depois tama prizaun durante tinan rua, oinsa los ho sira nia eskola, kuandu loron tolu ne’e la buat ida, ne’ebe atu foti desizaun ne’e presiza hare didiak,” Deputada ne’e fo hanoin.
Entretantu komunidade Baptista Soares, konkorda ho asaun husi POLTRANS, maibe presiza tetu didiak, tanba maske halo salah kiik, maibe nia konsekuensia ne’e bo’ot.
“inan rua iha prizaun ne’e mak presiza tetu,” Soares katak.
