Koordenadora Klinika Marie Stopes Internasional Timor –Leste (MSI-TL), Maria Fernanda Serra, hateten inan ne’ebe halo abortu la seguru sei hetan risku bo’ot ba sira nia vida bainhira la hetan atendimentu lalais husi pesoal saude sira,bele mate. 
Nia dehan, kazu abortu la seguru ne’e akontese duni iha rai laran, maibe to’o oras ne’e seidauk iha dadus ida ne’ebe konkretu kona ba inan hira mak halo abortu la seguru, tanba komunidade konsidera prolema ne’e sensitive.
“Tuir ita nia lei ne’e ilegal maibe realidade ne’ebe akontese iha rai laran iha inan barak halo abortus subar-subar hanesan dalaruma ita hakfodak inan ida soe oan iha fatin ida ne’e ida ne’eba,”Koordenadora Serra dehan, iha Vila Verde, Dili.
Nia hatutan, abortu la seguru akontese tanba inan feto sira isin rua la ho hakarak no ikus mai sira deside halo abortu.
“Ami iha kazu ida iha Oe-Cusse bainhira joven ida isin rua, maibe nia la prontu entaun halo abortu iha liur ran fakar barak ona foin lori ba iha fasilidade saude no refere mai iha Nasional maibe tarde ona inan ne’e mate,” nia dehan.
Iha mos kazu seluk akontese iha tinan rua liu ba estudantes SMA ida isin rua, tanba la pronto, nia ba iha matan dook uja aimoruk tradisional, ran fakar barak lori halai ba to’o iha sentru saude, la konsege salva nia vida, tanba ran fakar barak liu ona.
Halo abortu la seguru alem de risku bele mate, iha mos impaktu seluk mak hanesan infesaun ba ovariu no ikus mai bele laiha oan.
Nia hatutan liu katak durante ne’e iha duni inan feto balun mak husu klinika MSI atu halo abortu ho rajaun sira la prontu iha oan maibe MSI rezeita tanba MSITL servisu bazeia ba lei ne’ebe vigor.
Iha parte seluk, Prezidente Grupu Mulher Parlamentar (GMPTL), Deputada Josefa Alvares Soares, hateten Timor-Leste iha ona lei ne’ebe forte atu kondena ema sira ne’ebe halo aktu abortu la seguru ne’e maibe sei fraku iha implementasaun, tanba pesoal saude la foti prosesu ba oin.
Nia dehan, iha Kodigu Penal artigu 141 alinea 3, ne’ebe koalia kona ba feto isin rua ne’ebe fo konesementu ba ema seluk atu pratika abortu ka nia rasik mak provoka ho meus oi-oin halo abortu ba an rasik sei hetan pena prizaun tinan tolu, tanba krime halo violasaun hasoru direitu labarik.
“Implementasaun mak seidauk implementa ho diak se servisu de saúde ne’ebe detekta ema ne’e halo abortu ho hakarak rasik sira la foti prosesu hodi hasoru inan sira ne’e hatudu katak ita la tau seriadade ba implemetasaun lei ne’ebe iha entau ema hotu estraga labarik,” Deputada Soares preokupa.
Nia esplika, abortu iha oin rua ; abortu spontan, katak akontese derepente deit, kauza husi moras malaria, monu, stres ne’e oin seluk no ida seluk mak abortu ida ne’ebe provoka rasik husi inan ho meus oi-oin.
Depois fo ona impaktu ba kondisaun saúde mak halai ba fasilidade saude entau parte ospital tenke foti prosesu hasoru inan ne’ebe estraga labarik nia vida ho hakarak, labele nonok deit.
