Hahu husi fulan Janeiru to’o Setembtu 2013, kazu Violensia Domestika ne’ebe registu iha Servisu Investigasaun Kriminal hamutuk 5.41.
Xefe Interino Servisu Investigasaun Kriminal (SIK), Inspector Xefe Manuel Alves, hateten kazu hamutuk 5.41 ne’e kompostu husi violensia entre fen ho laen, aman ho oan, inan ho oan.
“Agora daduan kazu sira ne’e intrega hotu ona ba Ministeriu Publiku” dehan Inspector Xefe Manuel Alves, iha nia knar fatin, foin lalais.
Nia mos hatutan katak, Komparasaun kazu Violasaun Domestika (VD) iha tinan kotuk ho tinan agora, kuaze atu hanesan.
“Iha tinan ida ne’e ita seidauk kompleta to’o iha dezembru, foin maka husi januari to’o iha setempbru nia laran deit,” dehan Xefe Alves.
Motivu husi kazu sira ne’e kuandu konaba Fen laen, tanba kolia la rona malu, nune’e mos Violensia Domestika inan no aman hasoru oan, barak liu tanba oan sira la rona saida maka inan no aman kolia.
Entretantu Deputada Bendita Magno, hare ba numeru keiza violensia domestika nebe kada fulan no kada tinan barak ba bebeik, ne’e hatudu katak iha duni konsensia atu hato’o sai saida mak akuntese.
“Tanba lei ba ida ne’e iha, violensia domestika ne’e krimi publiku, feto mos iha maturidade,” dehan Deputada Bendita Magno, iha PN.
Maibe nia mos apelu ba komonidade atu hapara pratika violensia domestika, ou kualkuer violasaun hotu, tanba agora laos nia tempu ona.
“Agora ita tenke konsentra ba dezenvolvementu nasaun ida ne’e,” Deputada ne’e enkoraja.
