Prezidente Conselho Nasional Joventude Timor –Leste (CNJTL), Leovigildo Hornai,hateten presiza hametin no haforsa servisu nasional inteligensia atu bele halo atuasaun no mapamentu ne’ebe diak, nune’e bele deskobre grupu organizadu sira ne’ebe kria instabilidade iha rai laran. 
Nia hato’o kestaun ne’e relasiona ho kazu grupu Kipas Dulu Baru Tanya (KIBATA) ne’ebe sona mate joven ida iha area Markoni nian, iha 24 Setembru 2013.
Tanba ne’e nia afirma, servisu nasional intelijensia importante tebes, tanba informasaun prinsipal ne’e tenke mai husi sira, hato’o ba iha polisia sira atu halo kontrola vizilansia grupu sira ne’e nian iha komunidades nia le’et.
“Hau hanoin servisu intelijensia tenke rigorozu, no presiza halo diak liu tan, minimize movimentu grupu sira ne’e nian iha pais liu –liu capital Dili,” Prezidente CNJTL, Leovigildo Hornai dehan, iha Farol, Dili.
Nia mos husu ba servisu polisia investigasaun atu halo investigasaun ida profunda ba iha kazu ne’e, tanba bele joven sira ne’e involve iha grupu organizadu, vandalismu uja droga no alcohol, bele mos grupu sira ne’e iha ema lintas negara ruma iha laran, ne’e perigozu ba nasaun.
“Polisia military bele tiru sira nia ain, ne’e la’os violasaun direitus humanus,importante mak labele tiru sala ema deit,” lideransa joventude ne’e sujere.
Kazu omesidu ne’e akontese iha dia 24 foin lalais iha bairo Luro Mata ne’ebe rezulta joven ida mate iha fatin tanba hetan sona iha kakorok, ida sona iha parte kabun te oan sai ne’ebe oras ne’e dadaun halao tratamentu intensive iha Hospital Nasional no nain ida seluk sona iha liman.
Enkuantu autor nain rua ba kazu ne’e, oras ne’e dadaun detein hela iha prizaun Becora hodi hein prosesu tuir mai.
Iha parte seluk, Deputadu Eladio Faculto, konsidera servisu nasional inteligensia fraku, la funsiona ho diak, halo vizilansia ba movimentu grupu, inklui mos individu sira ne’ebe dramatiza situasaun halo komunidade sira trauma no paniku.
“Intelijensia la funsiona ho diak,” Deputadu Faculto kritika.
Iha parte seluk, Koordenador Programa Advokasia Asosiasaun HAK, Xisto Ximenes, hateten akontesementu ne’e seidauk bele dehan krime organizadu, bele mos joventude sira ne’e iha frustadu nia laran sira bele uja maneira sira ne’e hodi hakanek no hamate ema balun.
“Ne’e la’os frakeza iha seguransa nian, maibe tanba fator seluk bele iha mai husi aspeitu social no ekonomia, ema ida bele halo oi-oin bainhira sente la hakmatek hela iha sira nia uma laran,” nia dehan.
Nia hatutan, akontesementu ne’e hanesan mos reflesaun bo’ot ida ba governu no Igreja Katolika sira atu hanoin hanesan sasukat ida.
