Sekretaria Estadu ba Promosaun Igualidade (SEPI), Idelta Maria Rodrigues husu ba espouza husi membrus governu sira, tenke hatais tais hotu hodi akompanha la’en sira partisipa iha serimonia selebrasaun loron nasional feto ba dala 36. 
Tuir nia, ne’e hanesan meus ida atu promove no hatudu kultura Timor –Leste ba nasaun seluk, nudar identidade nasaun nian.
“Hau fo hatene ba espouza sira atu akompanha nia kaben sira no iha selebrasaun ne’e ita tenke hatudu ona ita nia kultura hanesan ita nia identidade,” SE Rodrigues hateten, bainhira hasoru malu ho espouza membrus governu, iha salaun enkontru Konselho Ministru, Dili.
Nia hatutan, oras ne’e dadaun sira nafatin halo sosializasaun ba ema hotu liu –liu membrus governu no orgaun sira seluk atu bele hatais tais hanesan identidade nasaun nian iha selebrasaun loron istoriku sira.
Loron nasional feto monu iha dia 03 Novembru, maibe nia selebrasaun hala’ o iha dia 08 Novembru, tanba iha kalendariu dia 01,02 Novembru ne’e loron feriadu nasional.
Nia dehan, tais ne’e bele modifika tuir ema ida-idak nia hakarak maibe nia motivu ne’e mak tenke tais.
Entretantu espouza Ministru Obras Publika, Brigida da Silva, konkorda atu ema hotu hatais tais iha eventu importante ne’e, hatudu ba nasaun seluk katak feto Timor –Leste iha nia kultura no identidade rasik.
“Hau hanoin sujestaun senhora Sekretaria Estadu ne’e diak tebes, ita bele promove ita nia kultura hanesan ita nia identidade ida ba ema nasaun seluk,” nia apoia.
Iha parte seluk, espouza Vise Primeiru Ministru, Marie Jacqueline A. Siapno, la konkorda no SEPI laiha direitu atu obriga espouza membrus governu sira hatais tais iha selebrasaun ne’e tanba tais Timor –Leste oras ne’e dadaun folin karun.
“Hau gosta uza tais, mais ida ne’e karun durante hau akompanha hau nia la’en ba eventu nasional no internasional, estadu nunka fo osan ba hau atu sosa tais,” nia dehan.
Hatan ba kestaun ne’e SE Rodrigues, katak la’os obrigatoriu maibe hanesan Komisaun Organizadora ba eventu ne’e, sira deside ona membrus governu no orgaun importante sira hotu inklui espouza sira atu hatais tais iha eventu ne’e.
“Depende ba ema ida-idak nia konsiensia,” SE Rodrigues katak.
Nia rekonese, katak tais Timor karun duni, tanba tais Timor fa’an ba ema estrangeirus Timor oan rasik la kohi sosa sira nia tais konserteza karun maibe ho meus ida ne’e tais sira ne’e bele folin tun tanba sira laiha estandarte folin ba tais sira.
