Organizasaun Asia Foundation lamenta programa desentralizasaun ne’ebe mak governu sei implementa iha distritu sira, tanba iha programa ne’e governu la tau importansia ba setor agrikultura.
Diretor Asia Foundation, Hugo Fernandes, hateten programa desentralizasaun ne’ebe mak governu sei atribui ba iha munisipiu mak hanesan,Ekonomia ,Turismu,Saude , Edukasaun no Agrikultura maibe setor agrikultura governu la atribui.
Tuir nia, povu Timor-Leste maioria moris ho vida agrikultura maibe governu haluha tiha setor agrikultura ba iha programa desentralizasaun.
“Ida ne’e kestaun tanba ita nia populasaun 80 pursentu mak agrikultor, moris iha area rural tanba sa mak setor agrikultor la atribui,” Fernandes la menta.
Diretor ne’e, hateten estabelesementu municipiu atu hetan osan mai husi setor agrikultura maibe setor ne’e governu la atribui.
“Tanba ne’e ita husu para governu preve fila fali politika ida ne’e para setor agrikultura tama iha poder ne’ebe mak fo iha municipiu sira ne’e,”Fernandes hato’o.
Entretantu Diretor Ezekutivu Lalenok Ba Ema Hotu(LABEH)Julio Gil da Silva Guteres esklarese katak,esbosu lei politika desentralizasaun ne’e mak setor agrikultura la tama.
Maibe iha sebosu lei pre-deskonsentrasaun ne’e iha,sira atribuisaun ba agrikukultura ne’e iha.
“Ita Timor ne’e maioria 80 pursentu mak agrikultor tanba saida mak sira la tama agrikultor,” ,”Guteres informa.
Nia sujere ba governu molok atu implementa pre-deskonsentrasaun no pre-desentralizasaun tenke hatama setor agrikultura tanba povu Timor-Leste maioria agrikultor.
Iha fatin hanesan Estudante Universidade Nasional Timor-Lorosae (UNTL), Inocencio de Jesus Xavier konsidera, ne’e grave tanba povu Timor-Leste nia rendimentu maioria mai husi setor agrikultura.
“Ne’e grave ba ita nia estadu tanba ita dependensia deit ba fundu mina rai,” nia katak.
Nia realsa tan katak,tuir lolos estadu no governu tenke dezenvolve setor agrikultura atu nune’e sai alternative ida ba reseitas mina rai.
“Hau husu ba Senhor Prezidente, bainhira atu promulga lei ruma, tenke konsidera item importante setor agrikultura nian,” Xavier sujere.
Tuir nia, atu nasaun ida sai forte, mak setor agrikultura mos tenke forte, nune’e bele sustenta aihan ba povu nia moris.
