Grupu feto rural distritu Baucau lamenta ho programa husi Sekretaria Estadu ba Promosaun Igualidade nian, ne’ebe halo deit iha nivel distritu, no la tama to’o iha sukus no aldeias.
Xefe Grupu Feto Rural distritu Baucau, Rita Freitas, hateten feto iha area rural barak mak sei falta kona ba informasaun, tanba barak mak nivel edukasaun to’o deit Pre-sekundariu.
Nia dehan, falta informasaun kona ba justisa, liu-liu konaba Lei Violensia Domestika, ne’e feto rural barak mak seidauk hatene.
“SEPI tenke realize sira nia programa tama to’o iha sukus, to’o iha area rural, la’os deit iha capital distritu,” Freitas sujere.
Nia mos dehan, hanesan kazu ruma ne’ebe feto sira hasoru iha baze, hato’o ba iha tribunal maibe dala ruma pendent hela deit.
“SEPI tenke fo atensaun ba kestaun sira ne’e, feto defisil atu hetan justisa ne’ebe justu,” nia dehan.
Iha parte seluk Deputada Josefa Alvares Soares, rekonese katak, los duni durante ne’e program SEPI nian sempre iha Dili deit, no iha nivel distritu deit nunka ba iha area remotas.
“Ita hakarak buka ida diak, ne’e deit karik, coba ita ba to’ok iha foho ne’eba, ami hare iha foho ne’e sei falta asesu ba informasaun, asesu ba saude, feto barak mate tanba hahoris,” Deputada Soares dehan.
Hatan ba preokupasaun ne’e Sekretaria Estadu Idelta Maria Rodrigues, katak feto rural sira ladun akompania saida maka akontese iha distritu.
“Iha distritu ami iha grupu trabalho jeneru, ami iha mos pontu focal ne’ebe ami tau iha ne’eba, agora iha problema la’os mai deit SEPI,” SE Rodrigues dehan.
Nia dehan, SEPI nia ema monta tiha ona sistema iha distritus, tanba ne’e sira (Feto Rural) mos tenke akompanha informasaun saida maka distritu sira sei hasai ba iha nivel distrital.
