Espouzas husi Membrus do Governus (Ministrus no Sekretarius Estadu sira) durante ne’e ladun partisipa iha serimonia loron nasional ruma hodi akompania sira nia maridu (la’en), tanba sente ofendidu husi protokolu sira.
Espouza Vise Primeiru Ministru, Marie Jacqueline A. Siapno, hateten durante ne’e nia ladun akompanha nia marido (la’en), iha serimonia nasional ruma, tanba sente ofendidu husi protokolu sira.
“Hau iha ona esperiensia uluk iha governu AMP, entaun hau baruk ten atu ba tuir serimonia sira hanesan ne’e, tanba hau hetan ona ilmu husi esperiensia sira ne’e,” preokupa espoza Vise Primeiru Ministru, Fernando Lasama de Araujo ne’e, bainhira partisipa enkontru entre SEPI ho espoza membru governu iha Palacio do Governu, Dili.
Nia hato’o kestaun ida ne’e, tanba nudar espouza husi membru governu husi governu AMP to’o agora, bainhira nia ba akompanha nia maridu iha serimonia nasional ruma, maibe tur fatin ba sira laiha.
“Protokolu presiza hadia no organiza didiak, la’os ema ba hadau malu fali kadeira,” nia kestiona.
Preokupasaun ne’ebe hanesan mai husi espouza Ministru Obras Publika, Suzana Brigida Esteves da Silva, katak durante ne’e koalia kona ba igualidade jeneru maibe konvite sira balun durante ne’e la konsidera espouza sira.
Nia dehan, iha konvite balun mak konsidera mos espouza sira, maibe sira sente ofendidu, tanba laiha fatin ba espouza sira, tenke buka fatin ba tur fali iha kotuk ne’e la los.
“Ita sente estreinu iha ita nia maluk sira nia le’et, tanba la’en sira nia hakarak tenke akompanha maske sente ofendidu,” lamenta espouza Ministru Obras Publika ne’e.
Entretantu, Sekretaria Estadu Promosaun Igualidade (SEPI), Idelta Maria Rodrigues rekonese, katak protokolu sei iha problema ne’ebe bo’ot, tanba ne’e ema hotu tenke kolabora ho protokolu sira.
Nia dehan, liu-liu halo korfirmasaun atu nune’e labele mosu lamentasaun ruma iha eventu istoriku (loron nasional feto) ne’ebe monu iha dia 03 Novembru kada tinan, liu-liu iha tinan ida ne’e sei hetan partisipasaun maximu husi nasaun lubuk ida husi liur.
“Ita iha problema bo’ot, la’os ba espouza sira deit, maibe ami membru governu mos dalaruma fatin sira ne’e lalos ba ami, iha buat barak mak ita presiza hadia tanba ne’e hau afirma ba espouza membru governu sira atu akompania nia kaben iha selebrasaun ida ne’e,” SE Rodrigues sujere.
Nia hatutan, katak ekipa protokolu ba selebrasaun loron nasional feto preparadu ona atu simu bainaka sira iha rai laran no rai liur hodi partisipa eventu importante ne’e.
