Organizasaun Forum Komunikasaun Joventude oras ne’e dadaun kria atividade oi-oin hodi anima labarik minoridade sira ne’ebe durante ne’e buka moris iha fatin lixu Tibar. 
Xefe Devizaun Edukasaun Forum Comunikasaun Joventude (FCJ), Januario Gago, hateten atividades ne’ebe hala’o kada semana ne’e, mak atividade joga bola, hanorin musika, alfabetizasaun, pinta, teatru no seluk tan.
Atividade hirak ne’e hala’o ho intensaun, hanesan meus ida atu enkoraja labarik sira no fo hanoin sira, katak edukasaun ne’e importante.
Nia dehan, atividade ida ne’e sira hala’o fulan ida dala hat iha Sentru Uma Mahon Miguel Magone ho Tibar atu halibur labarik sira no enkoraja sira.
“Atividade jeral ami hala’o iha Tibar no Balide, kada semana iha Tibar. Ami iha atividade lima hanesan alfabetizasaun, musika, dezeno, desportu ba labarik sira ne’ebe hala’o atividade hili foer iha fatin lixu,” Xefe Gago dehan, iha Balide, Dili.
Entretantu, Diretor FCJ, Viriato Alves Lobato, hateten atividade ida ne’e hanesan meus aprosimasaun ida atu identifika problema no dificuldade ne’ebe labarik sira hasoru liu –liu violasaun ruma.
“Atu hatene lolos labarik hirak mak la eskola no hira mak eskola no sira nia kazu ne’e saida hanesan violasaun no krime ruma,” nia dehan.
Iha future, nia dehan FCJ sei esforsu an atu servisu hamutuk ho Sekretariu Estadu Politika Formasaun Profesional e Empregu (SEPFOPE) atu kria fatin formasaun ida iha Tibar, hodi kria atividade ruma hodi enkoraja labarik sira iha fatin ne’eba tanba kuaze labarik atus lima resin kada loron halao servisu hili foer iha fatin lixu.
Iha parte seluk komunidade Tasi Tolu, Teresa da Araujo ne’ebe hala’o mos servisu hili foer iha fatin lixu Tibar sente apresia ho atividade ne’ebe organizasaun ne’e hala’o, tanba bele kria netik atividade ba labarik sira.
“Maun sira iha ne’e tun ba hala’o atividade sira ne’e atu halibur labarik sira iha ne’e no sira mos bolu ami ho labarik sira ba hela iha sentru uma Mahon Magone tanba ami laiha fatin ne’ebe seguru,” nia dehan.
Tuir estatistika FCJ nian, katak oras ne’e dadaun labarik vulneravel hamutuk nain 23 no inan oan nurak ida mak hela iha Uma Mahon Miguel Magone, tanba sira laiha kondisoens ne’ebe diak ba sira atu hela ba.
