Ministeriu Edukasaun aloka tan $3,900,000 husi Orsamentu Jeral do Estadu tinan 2013 nian atu sosa meja no kadeiras ba eskola sira ne’ebe durante ne’e estudante sira tur deit iha rai hodi tuir prosesu aprendizajen.
Ministru Edukasaun (ME), Bendito Freitas, hateten orsamentu $3,900,000 ne’e dadaun ne’e iha ona Komisaun Nasional Aprovizionamentu (KNA), tanba tuir Lei Tribunal de Kontas nian, katak molok atu ezekuta osan ne’e tenke liu husi Tribunal de Kontas, halo verifikasaun.
“Mesmu iha tiha ona revizaun ba lei ne’e, mais neste momentu iha ona Komisaun Nasional Aprovisionamentu,” Ministru Freitas dehan, iha Dili.
Tanba ne’e, nia husu atu prosesa lalais osan refere para bele sosa ona kadeira no meja iha fulan Outubru nia laran bele to’o ona.
“Ita hein katak ita bele hetan mais ou menus 30 to’o 40,000 karteiras,” Ministru Freitas esperansa.
Iha sorin seluk Deputy Diretor Luta Hamutuk, Joaozino Viana hateten, durante ne’e orsamentu ne’ebe governu ladun fo atensaun masimu ba iha setor edukasaun, tanba orsamentu edukasaun ne’ebe mak aprova husi Parlamentu 5,7% deit.
Viana dehan, tuir lolos nasaun ne’ebe mak foin ukun an hanesan Timor orsamentu ba setor edukasaun minimu tenke 25%.
“Ami fiar katak 25 pursentu depois Ministeriu Edukasaun implementasaun ne’ebe mak diak ne’e bele rezolve problema edukasaun iha tinan lima nia laran,” Viana hato’o.
Kuandu governu la tau orsamentu 25% ba iha setor edukasaun sei hamosu tan problema barak iha edukasaun ninian.
“Ami husu ba Ministeriu Edukasaun no mos ba Parlamentu Nasional atu prioridade masimu Orsamentu Jeral do Estadu ba iha edukasaun to’o 25 %,” Deputy Luta Hamutuk ne’e sujere.
Tuir observasaun ne’ebe Luta Hamutuk iha, nota katak eskola barak iha distritu barak mak estudantes sei tur iha rai hodi tuir prosesu aprendizajen, tanba meja no kadeira laiha.
“Ami to’o iha Suai sira uja deit au no balun tur deit iha rai,ami ba Ermera mos hanesan, ami ba Liquidoe distritu Aileu fatin barak sei falta meja no kadeira,” Viana kestiona.
Entretantu Joao da Silva, Estudante Universidade Nasional Timor-Lorosae (UNTL), hateten tinan barak ona eskola sira hakilar kona ba meja no no kadeiras, maibe to’o agora problema ne’e seidauk rezolve.
“Ita la’o ba distritu sira ita hare balun kondisaun eskola deit la diak ona no balun kondisaun diak maibe falta meja no kadeira sira,” nia dehan.
Tanba ne’e nudar estudantes, nia husu ba Ministeriu Edukasaun tenke kontrola ba kondisaun eskola inklui fasilidades sira, atu nune’e labele prejudika ba estudante sira nia aprendizajen.
