Polisia Servisu Investigasaun Kriminal temporariamente hapara prosesu investigasaun ba suspeitu AJ ba kazu oho vitima ST, tanba agora dadaun suspeitu ho kondisaun saude grave.
Suspeitu AJ diskunfia oho ST ne’ebe nudar nia doben ho bobar selendang iha ST nia liman no kesi vitima nia kakorok ho fiu catok fuuk nian, ne’ebe rezulta vitima mate kedas iha fatin.
Akontesementu ne’e rasik akontese iha 04 de septembru kauze tuku 05:00 madrugada, iha aldeia Bee Dalan, suku Bairo-Pite, sub-distritu Vera Crus, distritu Dili.
Supeitu rasik agora dadaun ho kondisaun saude ne’ebe grave no hala’o hela tratamentu iha Ospital Nasional Guido Valadares (HNGV), tanba ne’e prosesu investigasaun ba nia kazu sei pendent.
Xefe Interino Servisu Investigasaun Kriminal (SIK), Inspektor Xefe Manuel Alves, hateten prosesu investigasaun bele hahu fali, depois de suspeitu nia kondisaun diak fali.
“Agora ita hare, katak ninia kondisaun grave oituan, ita sei kontinua ho prosesu investigasaun depois de ida ne’e,” Xefe Alves dehan, iha Kaikoli, Dili.
Nia dehan, prosesu investigasaun ba dala uluk hala’o tiha, maibe labele kontinua tanba suspeitu ho kondisaun ne’e grave, tanba ne’e sira rekomenda atu lori AJ ba HNGV hodi hetan tratamentu.
“Iha momentu ne’eba nia mosu mai mos, ho kondisaun nian ne’ebe grave oituan,” Xefe Alves tenik.
Vitima ST deskobre ho kondisaun mate, liman no kakorok bobar metin ho selendang no fiu, osan $30,00 iha hela nia liman no osan $50,00 iha nia kalsa bolsu.
Antes ne’e, vitima ne’ebe nudar estudante terseira klase iha Eskola Sekundariu ida iha Dili laran. Iha momentu ne’eba vitima estuda hela prepara ba ezame nasional, derepenti telephone lian no vitima simu, no iha momentu ne’eba inan husi vitima sona hela dosi, no rona hela vitima simu telephone, maibe la hatene telephone ne’e husi se?.
Wainhira vitima nia inan atu ba loke odamatan maibe odamatan xavi hela e la kleur deit komunidade sira iha bairo ne’e hakilar dehan, vitima mate tiha no latan hela iha rai, distansia husi uma kuaze metro 25 deit husi fatin akontesementu ne’e.
Iha parte seluk Deputadu Francisco da Costa, hateten ida ne’e asaun ne’ebe grave tebes no presiza halo investigasaun ne’ebe profunda.
“Maibe agora dadaun nia sei iha hela hospital atu simu tratamentu, ne’ebe klaru ke prosesu investigasaun sei hein hela to’o suspeitu nia saude diak,” Deputadu da Costa dehan.
Nia mos husu ba Polisia SIK atu servisu ho seridade, nune’e bele hetan justisa ne’ebe justu iha kazu ne’e.
Iha parte seluk Estudante Rino Soares, hateten oho la’os razaun hodi resolve problema, tanba ne’e nia apela ba komunidade hotu-hotu atu wainhira iha problem tenke iha konsiensia atu koalia ho ulun malirin atu bele hetan solusaun ne’ebe diak.
