Treianamentu ne’ebe durante ne’e hala’o ba membru Falintil-Forsa Defeza Timor-Leste, tuir duni sistema North Atlantic Treaty Organization, tanba dutrina NATO iha duni nia vantajen. 
Komandante Falintil-Forsa Defeza Timor-Leste (F-FDTL), Brigadeiru Filomeno Paixao, hateten military Portugal (Portugal membru NATO) mak fo treinamentu ba membru F-FDTL, no kona ba kursu promosaun Sarjentu, ba Ofisiais, Kapitais, ba Major to’o iha Jeneral hasai hotu iha Portugal.
“Tanba ne’e hau dehan kaer dutrina NATO, e la’os deit Portugal, maibe mos Australia, Amerika, Malaysia inklui mos Cina.
Maibe, nia dehan sira ne’e fo treinamentu kualifikasaun deit, espesialidades atu sa’e ba kapitaun tenke ba eskola tuir Portugal nian.
Tuir nia, durante ne’e iha membru F-FDTL barak mak fo ona sira nia kontribuisaun ba nasaun sira ne’ebe presiza ajudus, liu-liu nasaun sira ne’ebe konflitus hela.
“Iha tinan kotuk iha seksaun ida maka ba iha Lebanon, halo servisu iha ne’eba durante tinan ida, agora sira fila tiha ona,” Brigadeiru Paixao katak.
Agora dadaun, nia afirma F-FDTL prepara fali ona major nain tolu no engeneria atu ba fali iha Lebanon no balun ba iha nasaun sira ne’ebe presiza tulun.
Iha parte seluk Deputadu Inacio Moreira, hateten tuir dutrina NATO ne’e diak no kona ba membru F-FDTL sira ne’ebe mak durante ne’e fo ona sira nia kontribuisaun ba iha rai seluk, ne’e pasu positivu ida.
“Ne’e hatudu, katak ita nia forsa mos iha ona kapasidade para bele partisipa iha misaun nasoens internasionais in partikular iha NATO,” Deputadu Moreira dehan.
Tuir nia, hakarak ga lakohi, diak ga ladiak hanesan nasaun soberanu Timor – Leste tenke partisipa iha servisu umanitaria in partikular ba iha nasaun sira ne’ebe mak konflitu no agradese ba iha NATO nia konsiderasaun ba Nasaun Timor-Leste durante ne’e.
