Dadaun ne’e atendementu ba Buletin Identidade ba populasaun sira seidauk bele, tanba sistema seidauk los.
Diretor Nasional Registo Sivil e Notariado Distritu Dili, Vitor da Cota Neto, hateten sistema atendementu ba Buletin de Identidade (BI) taka desde tinan 2012 to’o agora.
“Ita nia atendementu ba publiku kona ba BI provizoriamente taka, tanba ita nia sistema seidauk la’o los, hein nai ulun sira halo negosiasaun foun atu loke fali atendementu BI ba populasaun sira,” Diretor Neto dehan, iha Kaikoli, Dili.
Nia dehan, alem de sertidaun RDTL, BI mos importante tebes ba populasaun sira, tanba hanesan dokumentus ida ne’ebe prova, katak ema ida ne’e husi pais ida ne’e no bainhira halo viajen ruma ba rai liur ou trata dokumentus ruma, presiza BI.
Diretor Neto informa, desde estabelese iha tinan 2011 sistema tekonologia ne’e, Diresaun Nasional Rejistu no Notariadu (DNRN) konsege fo ona atendementu BI ba populasaun hamutuk nain 6.968.
Iha parte seluk, komunidade Comoro, Alcinda Pinto, hateten governu iha obrigasaun halo re-estabelese sistema foun ida, nune’e komunidade sira bele trata sira nia BI.
“Ba ami nudar estudantes kartaun ida ne’e importante tebes, tanba ita atu ba kontinua estudu iha rai seluk, ita presiza kartaun ida hodi dignifika ita katak ita husi nasaun Timor-Leste, se la’e ema la fiar ita,” nia dehan.
Nia mos husu ba Ministeriu Justisa, atu justifika kauza husi sistema avaria ne’e no buka dalan oinsa para resolve tiha.
Entretantu Ministru Justisa, Dionisio Babo rekonese, katak sistema avaria duni durante ne’e, tanba sistema ne’e teknologia demais.
Nia hatutan, sira iha ona hanoin atu resolve iha tempu badak, nune’e bele fo atendementu ba populasaun sira hodi asesu ba sira nia dokumentus sira hanesan BI.
