Diretor Jeral Ministerio Saude, Jose Reis Magno hateten, ministeriu sei muda ses Sentru Saude Bairo-Pite husi Klinika Bairo-Pite, iha tempu badak.
Nia dehan, maske seidauk iha desizaun ida klaru, maibe iha ona komitmentu atu haketak Sentru Saude Publiku ho Klinika Bairo-Pite (KBP) ne’ebe durante ne’e kompleks ida deit, nune’e bele evita problema.
“Ami tenta hela atu oinsa iha tempu badak ne’e iha edifisiu proprio ida ami muda ses ona sentru saude ida publiku ne’e para ida-idak hala’o nia servisu,”DJ Magno dehan, iha Kaikoli, Dili.
DJ Magno hatutan, Klinika Bairo Pite ne’e klinika privadu ne’ebe kada fulan hetan $15,000 husi governu atu fo asistensia saude ba populasaun sira iha distritu Dili. Iha fatin ne’e be hanesan iha mos sentru saude Veira Cruz nian ne’ebe ho nia struktura rasik atu fo asistensia saude ba populasaun mos.
Desizaun ne’e foti relasiona ho informasaun ne’ebe publika husi media nasional sira bazeia ba keixa husi pesoal saude balun, katak mosu irregularidade no mal administrasaun iha Klinika Bairo Pite.
Iha parte seluk, Membru Komisaun F Parlamentu Nasional (saude, edukasaun, igualidade jeneru no Veteranus), Deputadu Eladio Faculto, hateten sira seidauk identifika lolos problema ne’ebe iha maibe tuir informasuan ne’ebe sira rona husi pesoal sira mak kona ba jastaun administrasaun inklui mos kordenasaun entre CHC publiku no KBP mak laiha.
Nia dehan, tenke haketak sira CHC ho KBP no pesoal saude sira ne’ebe durante ne’e halao servisu iha KBP buka fatin atu destaka ema sira ne’e hodi fo asistensia ba populasaun atu klinika privadu halo sira nia servisu.
“Hau hanoin governu tenke buka dalan seluk atu resolve maibe husi mensagen ne’ebe hau simu husi komunidade balun katak sira presiza duni sentru saude ida iha area veira cruz nian,” dehan Deputadu Faculto.
