Komisaun Funsaun Publika servisu hamutuk ho Instituisaun Nasional Administrasaun Publiku asina akordu ho universidade tolu iha Indonezia hodi kapasita Funsiunariu Publiku sira.
Prezidente Komisaun Funsaun Publika (KFP), Komisariu Liborio Pereira, hateten akordu ne’e importante tebes atu formaliza koperasaun entre KFP ho Universidade sira ne’ebe durante ne’e simu no kapasita ona funsionario publikus sira.
“Komisaun Funsaun Publika hare, katak dezenvolvimentu kapasidade ita nia funsionario sira nian laiha tan eskoilha seluk, ida ne’e hanesan investimentu importante ida, para ita bele eleva kualidade servisu no atendimentu publiku ba ita nia sosiedade,” Komisariu Pereira dehan, iha Colmera, Dili.
Alem de asina akordu ho Universidade Brawijaya-Malang, Universidade Jember no Universidade Kristaun Satya Wacana (UKSW), Komisariu Pereira dehan, mos asina akordu ho instituisaun publika sira iha Indonesia hanesan Indonezia Australia Language Foundation (IALF) no seluk tan.
Tuir estatistika KFP nian, hatudu katak to’o oras ne’e dadaun funsionario hamutuk 142 mak hala’o hela estudu iha Indonesia liu –liu universidade sira ne’ebe kontratu ona ho KFP no iha tempu badak sei haruka tan.
Nia dahan funsionario sira ne’e balun ba foti estudu lisensiatura, mestradu, diploma iha area espesifiku hanesan komputer, akuntabilidade, lingua no seluk tan, ho durasaun balun tinan rua, tolu no to’o tinan lima.
Tanba ne’e husu ba funsionario sira atu aproveita tempu ne’ebe iha hodi dezenvolve sira nia an no sira nia kapasidade atu bele fila mai fo kontribuisaun makas ba dezenvolvimentu servisu administrasaun publika.
Nia informa, KFP no INAP sei la tolera no ameasa sei hapara funsionario sira ne’ebe sai fali mahasiswa abadi no hatudu komportamentu la diak durante halao estudu iha Indonezia, tanba iha ema barak mak hakarak ba remata nia estudu.
“Ami buka atu konsolida didiak ita nia metodu supervizaun no avaliasaun para ital abele soe let deit osan ita nia povu nian ne’ebe estado tau iha fundus dezenvolvimentu umanu,” Komisariu Pereira katak.
Kriteria profesional mak, funsionario tenke minimu servisu permanente tinan tolu, avaliasaun tenke bom, hetan autorizasaun husi nia diretor katak funsionario ne’e hakarak no iha potensialidade atu hasae nia kapasidade, ikus liu fila mai tenke servisu nafatin iha ministerio ne’ebe nia servisu ba.
Iha parte seluk, Vise Prezidente Parlamentu Nasional, Aderito Hugo, hateten akordu ne’e importante tebes atu eleva kapasitasaun ba funsionario publiku sira iha area espesifiku sira ne’ebe estadu tau hanesan prioridade.
Nia hatutan, katak iha tinan ida ne’e Parlamentu Nasional aprova orsamentu ho montante mais ou menus $45,000,000 ba fundu dezenvolvimentu capital umanu atu kapasita funsionario sira iha Administrasaun Publiku, estudantes inklui mos Forsa Armada no PNTL sira.
“Fundus Dezenvolvimentu capital umanu laos deit ba estudantes sira maibe ba mos funsionario actual sira ne’ebe servisu hela iha administrasaun publiku no Funsionario sira ne’ebe servisu iha Defeza Seguransa inklui mos polisia nasional sira,” Vise Hugo katak.
