Organizasaun Search For Common Ground ho Belun entrega fundus $12,000 ba Grupu Rede Prevensaun no Responde ba Konflitu hamutuk neen, ho intensaun atu minimize konflitu iha nivel sub-distritu neen ne’ebe iha.
Diretor Search For Common Ground Timor-Leste (SFCG), Jose Francisco de Sousa, hateten kada grupu ida sei hetan orsamentu ho montante $2,000, atu halo atividade dialogu ou sosializasaun ruma kona ba prevensaun no redusaun konflitu iha komunidade sira nia le’et.
Grupu Rede Prevensaun no Responde Konflitu (RPRK) ne’ebe pasa iha selesaun atu hetan fundus, mak grupu RPRK sub-disrtritu Metinaro, Bazartete, Same, Gleno, Atabae no Maliana.
Fundus ida ne’e mai husi Komisaun Uniaun European liu husi Servisu Ordenador Nasional Ministerio Finansas atraves liu husi organizasaun SFCGTL ho Belun hodi dezenvolve kapasidade organizasaun sira hodi kria aktividade redusan no prevensaun konflitu ne’ebe akontese iha komunidade nia le’et.
“Fundus ida ne’e fo ba rede prevensaun sira iha sub-distritu atu kria aktividade ruma ne’ebe relasiona ho prevensaun no redusaun konflitu,” dehan Diretor Sousa, iha Tower Fatu Hada Dili.
Nia hatutan, katak alem de iha mos fundus ki’ik ba foinsa’e sira hodi halao empreza ruma ne’ebe la’o durante tinan ida.
Nia dehan, atu garantia ezekusaun orsamentu ne’e ho diak no fo duni impaktu ba komunidade, SFCG mos fo formasaun kona ba halo planu ba aktividade no hakerek relatorio orsamentu ba grupo sira hafoin entrega fundus hodi implementa atividade.
Entretantu,reprezentante RPRK sub-distritu Metinaro, Alfredo Soares Fernandes, apresia ho programa ne’e tanba antes ba implementa aktividade sira hetan uluk formasaun no halo planu ba aktividade.
“Ami sei halo sosializasaun kona ba tara bandu relasiona ho problema disputa rai, animal no seluk tan ne’ebe bele kria mos konflitu,” nia dehan.
Nia hatutan, meus sosializasaun ne’ebe sira sei uja mak dialogu ne’ebe sei partisipa mos husi orgaun estadu hanesan edukasaun, saude, justisa, seguransa atu fahe hanoin kona ba sistema tara bandu la signifika lei la forte, maibe komunidade barak sei fiar ba ida ne’e.
Iha fatin hanesan reprezentante RPRK Gleno, Luisa Lemos Salsina, hateten ho fundus ne’ebe iha sira sei esforsu atu halo servisu hotu hodi kontribui redus konflitu iha rai laran, maibe la’os atu halakon tanba presiza tempu.
“Ami halai liu ba desentralizasaun atu fahe informasaun ba komunidade kona ba desentralizasaun no municipio,” Luisa katak.
