Iha tinan 2013 ne’e Ministeriu Obras Publiku, iha planu atu halo ponte rua iha Dili, atu bele fasilita komunidade sira hodi halo atividade lor-loron.
Sekretariu Estadu Obras Public (SEOP), Luis Vaz Rodrigues, hateten ponte rua ne’e, ida iha Comoro no ida iha Aimutin nian.
“Ponte Comoro 1 no halo tan ponte ida iha Loza Banana Road nia oin,” Sekretariu Estadu Rodrigues katak, iha Dili.
Maibe antes ne’e nia dehan, planu ne’e sei hato’o ba iha Konselho Ministru no kona ba ponte Comoro I sei kaer nafatin husi kompania Consorsiu Nasional Timorense (CNT) no Wika Karya husi Indonezia ne’ebe kaer ponte Comoro II.
Enkuantu ba Banana Road nia oin, nia afirma, sei iha prosesu hela.
“Agora dadaun ne’e seidauk bele halo selesaun ba iha komphania, tanba foin maka komesa halo nia dezenu no hahu loke tender ona,” Sekretariu Estadu ne’e katak.
Iha lidun seluk Deputada Angelica da Costa, apoia inisiativa ida ne’e, wainhira iha planu atu halo ponte ne’e diak no iha duni nia nesesidade.
“Importante maka tenke halo ho kualidade no tenke halo tuir dezenu ne’ebe mak iha, labele arbiru deit,” Deputada ne’e hateten.
Nia parte hato’o kestaun ne’e, tanba obra barak mak hafoin halo remata maibe laiha kualidade, hanesan estradas no ponte sira.
Entretantu komunidade Tomas Fernandes hateten, ponte ne’e presiza duni halo no tenke halo tuir dezenu ne’ebe iha ona no tenke ho kualidade.
“Labele halo hanesan ponte Comoro II ne’ebe as liu fali ponte tuan, ne’e ita hare ladun furak,” Fernandes kritika.
