Roo ambulansia foun ne’ebe Ministeriu Saude entrega ba iha Sentru Saude Atauro, dadaun ne’e la halo operasaun tula pasientes (emergensia) mai Ospital Nasional Guido Valadares (HNGV), tanba kondisaun at.
Diretor a Servisu Saude Distritu Dili, Agustinha da Costa, hateten hafoin entrega husi Ministru Saude, Sergio Lobo iha dia 30 Julhu ba Xefe Sentru Saude Atauro no iha dia 02 Agustu 2013 koko halo halo viajen husi Dili ba Atauro, ho intensaun atu hare kondisaun roo ne’e.
“Ami to’o iha Atauro oras ida ho balun depois ami fila husi ne’eba mai hetan motorizada ida faila iha tasi klaran, ami konsege aguenta to’o mai iha Dili, e oras ne’e dadaun para hela,” Diretora Agustinha informa, iha edifisiu Ministeriu Saude Kaikoli, Dili.
Tuir nia, prezensa ro ambulansi ane’e importante tebes ba sira, tanba durante ne’e sira nia parte desaraska bainhira pasiente emergensia ruma atu halo transfere mai HNGV.
Kona ba kestaun ne’e nia dehan, sira halo ona proposta ba ministeriu atu husu responsabilidade kompania ne’ebe sosa roo ambulansia hodi halo manutensaun, tanba roo ne’e seidauk uja no foin koko deit at faila kedas.
“Hau triste, tanba ita hakarak buat ne’ebe to’o ona ita uja fasilita komunidade sira, maibe realidade akontese dadaun at fali, ” Diretora da Costa katak.
Nia dehan, durante ne’e sira iha roo ambulansia ki’ik ida hodi halo programa mobile clinic inklui mos halo referral ba kazu emergensia ruma mai iha HNGV ne’ebe oras ne’e dadaun la’o hela.
Alem de ne’e, nia afirma, sira servisu hamutuk mos ho Unidade Polisia Maritima (UPM), atu ajuda halo referral ba kazu emergensia ruma hodi hetan atendimentu saude iha HNGV bainhira roo ki’ik ne’e labele viajen, tanba laloran bo’ot.
Roo ambulansia foun ne’e hola husi Kompania Indonesia PT. Samudra Perkasa ho orsamentu jeral 2012 nian ho montante $400,000.
Entretantu Diretor Nasional Apoio Servisu Hospitalar e Encaminhamentu, Horacio Sarmento da Costa, hateten ida ne’e responsabilidade kompania nian atu hadia, tanba sei iha masa garansi nia laran fulan tolu.
“Ami informa ona ba iha kompania no sira identifika ona, katak motor mak at no sira prontu atu hadia fila fali iha tempu badak,” Diretor da Costa dehan.
Nia mos afirma, katak ministerio iha planu atu sosa tan ro ambulansia ida hodi fasilita fasilidade saude iha sub-distritu Atauro no distritu Oe-Cusse, nune’e bele halo referral ba pasiente emergensia ruma mai iha HNGV.
