Membru Parlamentu Nasional kestiona maka’as kona ba kanalizasaun bee moos iha sub-distritu Iliomar, distritu Lautem ne’ebe abandona husi kompania ne’ebe kaer projetu ne’e.
Deputada Angelica da Costa, hateten kanalizasaun ne’e foin hahu iha fulan hat ba kotuk, maibe agora paradu, tanba ne’e nia husu ba governu atu husu responsabilidade iha kompania ne’ebe kaer projetu ne’e.
“Governu tenke halo kontrolasaun ne’ebe maka diak, atu nune’e bele iha kualidade, la’os halo tiha la to’o fulan, at fali ona,” Deputada da Costa kritika, iha Parlamentu Nasional.
Iha parte seluk komunidade Iliomar Jose Sarmento, hateten, kanalizasaun bee moos ne’e pronto tiha ona, maibe laiha kualidade.
“Kanu ne’e at tiha fali ona no bee la mai kuaze semana ida ona,” komunidade Sarmento.
Durante ne’e, nia afirma, komunidade sira iha fatin ne’e araska tebes ba bee moos, tanba ne’e husu ba kompania ne’ebe kaer projetu ne’e atu responsabiliza, nune’e bee bele la’o fali.
Hatan ba preokupasaun ne’e Ministru Obras Publiku (MOP), Gastao de Sousa, hateten ne’e preokupasaun ida, tanba kompania ne’ebe maka kaer projetu ne’e tuir duni sira nia kapasidade.
“Maibe lolos ne’e kompania sira bainhira obra ne’e hotu, sira mos tenke kontrola katak obra ne’e diak ka la’e no governu iha esforsu mos atu kontrola sistema sira ne’ebe mak la’o dadauk,” Ministru de Souza dehan.
Nia dehan, kona ba ida ne’e husi MOP sei toma atensaun. “Ita sei hare no sei rezolve kestaun ne’e,” Ministru ne’e katak.
