Rede Edukasaun Timor-Leste Coalition for Education, sente triste ho kondisaun estudantes ne’ebe governu hasai ho obrigatoriu iha eis Hotel Rezende iha fulan kotuk, tanba sira lakon sira nia hela fatin.
Matias dos Santos, Program Manager Timor-Leste Coalition for Education (TLCE), hateten estudante hirak ne’e laiha hela fatin iha Dili.
“Sira sei laiha fatin ne’ebe mak atu hela no barak mak la ba eskola, tanba ida ne’e hanesan presaun ida ba sira,” Program Manager dos Santos dehan, iha Kai-koli, Dili.
Tuir nia, problema ida ne’e bele afeta ba estudante sira nia prosesu aprendizajen, liu-liu agora besik ona ezame.
“Eskola balun sira atu komesa ona ezame, ezemplu UNTL sira atu halo ona ezame, maibe agora sira laiha ona fatin no tenke buka fatin seluk,” Program Manager TLCE ne’e preokupa.
Nia dehan, lolos governu kria uluk kondisaun antes halo eviksaun ba okupante sira, ne’ebe maioria estudantes ne’e.
Hatan ba kestaun ne’e, Administrador Distritu Dili, Gaspar Soares, katak laiha hela fatin la’os razaun ida, tanba antes mai eskola iha Dili, tenke iha planu diak inklui hela fatin.
“Se ita husi Ainaro, Aileu no husi Baucau, bainhira mai eskola iha Dili tenke iha kondisoens, kos uma, buka han iha ne’ebe, atu han oinsa, ne’e tenke ser iha planu,” Administrador ne’e dehan.
Nia hatutan, lolos estudantes universidade mak iha liu komprensaun duke ema bai-bain, katak sasan estadu nian, fob a estadu bainhira presiza.
Tanba ne’e nia husu ba komunidade sira atu labele okupa illegal ba propriedade estadu nian, nune’e ikus mai governu presiza halo dezenvolvementu ruma, ulun la moras.
Iha fatin hanesan, Komandante Distritu Dili, Pedro Belo, dehan orden ne’e orden no polisia ezekuta orden ne’e. “Ital abele halimar fali ho orden, se lament abele koalia ho orgaun kompetente,” Komandante Belo dehan.
