Diretor Rekursu Humanus iha Tribunal Rekursu, Higino Soares, hateten dadaun ne’e Tribunal Rekursu sei menus rekursu humanus iha area administrasaun nian.
Tuir nia, staf iha administrasaun agora dadaun iha deit nain 14, nain hat iha finansa, parte logistika nain rua no iha Information Tecnician (IT) staf nain tolu deit.
“Ita presiza staf barak, tanba ita sei fahe ba tribunal distrital sira,” Diretor Soares, iha Kaikoli,Dili.
Tanba ne’e nia dehan, agora dadaun iha planu atu halo rekrutamentu staf foun ba area administrasaun nian.
“Ami sei halo rekrutamentu ba ema nain 49, nune’e bele fo atendementu ne’ebe diak iha area administrasaun nian,” Diretor Soares.
Mesmu nune’e, nia afirma sira esforsu aan atu hala’o servisu administrasaun nian ho diak. “Ami back up malu,” Diretor Soares tenik.
Iha parte seluk Deputadu Virgilio da Costa Hornai, hateten, ne’e kestaun importante no presiza duni atu tau matan.
“Governu no Tribunal Rekursu rasik presiza hare kestaun ne’e, tanba atu institusaun ida bele la’o ho diak no efikas presiza tebes, rekursu humanu,” Deputadu Hornai dehan.
Maibe nia dehan, buat hotu presiza tempu, fiar katak ba oin faltas sira ne’e bele kompleta hotu, atu atendementu iha parte sira hanesan ne’e bele la’o ho diak.
Iha parte seluk komunidade Maria Fernandes, hateten, rekursu humanu iha Timor-Leste sai kestaun bo’ot no governu presiza tau matan.
