Governu Timor-Leste sei kria ajensia temporariu ida iha Guine Bissau no tuir membru Parlamentu Nasional katak, governu aprova ona orsamentu ba planu ida ne’e, nune’e bele fo apoia ba povu iha rai ne’eba, ne’ebe dadaun ne’e konflitu hela.
Deputadu Duarte Nunes hateten, kria ajensia ida ne’e bazeia ba rekomendasaun reprezentante especial Nasoens Unidas (ONU) nian iha ne’eba, ne’ebe mos nudar Timoroan, Doutor Jose Ramos Horta bainhira mai vizita iha Parlamentu Nasional.
“Oportunu ona ga la’e ajensia ne’e hala’o nia atividade iha ne’eba ho governu atual, ga depois eleisoen,” Deputadu Nunes dehan, iha Parlamentu Nasional.
Iha fatin hanesan Deputada Maria Lurdes Bessa , duvida katak kondisaun favoravel duni ka la’e atu kria ajensia dezenvolvementu iha Guine Bissau.
“Ninia implementasaun kondisaun favoravel ga la’e,” Deputada Bessa duvida.
Entretantu reprezentante especial Sekretariu Jeral ONU iha Guine Bissau, Doutor Jose Ramos Horta informa, agora seidauk bele hili reprezentante sira iha ne’eba tanba edifisiu ba ajensia dezenvolvementu ne’e seidauk loke.
“Maibe ohin senhor Primeiru Ministru hili tiha ona eis Vise Ministru Negosiu Estranjeiru, Alberto Carlos, nia mak sei tur iha ne’eba,” reprezentante SEKJER ONU ne’e dehan.
Razaun hili eis Vise Ministru Carlos, tanba tuir Horta, nia iha esperiensia, uluk nia servisu tinan lubuk ida tur iha Sudan no iha Afrika iha situasaun ne’ebe defisil.
“Ita la lori ema barak ba iha ne’eba ,ita lori ema ida ka rua deit para atu ezekuta no buka parseria iha ne’eba,” Horta katak.
Nia dehan, apoia ne’ebe governu Timor-Leste sei fob a Guine Bissau tenke agora kedas, tanba lider politikus iha ne’eba esforsu halo presaun oi-oin.
“Komunidade internasional kosar metan suli halo akordu ne’e, entaun ita mos komunidade internasional tenke mos rekonese sira nia esforsu fo apoia,” Horta dehan.
Enkuantu tuir Deputadu Adriano Joao, katak vizita Horta mai iha Parlamentu Nasional ne’e importante tebes, tanba la’os atu hatene deit mudansa social maibe presiza buat barak iha rai ne’eba.
“Ita mos presiza hatene mudansa uja osan $2,000,000 ne’ebe mak aloka ba iha ajensia dezenvolvementu nian iha ne’eba, e ida ne’e mak ami hakarak,” Deputadu Joao dehan.
