Komandante Polisia Tranzito Nasional, Inspektor Xefe Antonio L.C.Soares hateten, agora dadaun sira nia parte presiza ekipamentus apaleru (alat test ema lanu) nian, nune’e bele fasilita servisu polisia tranzito nian ho diak liu tan iha future.
Komandante Polisia Tranzito Nasional (POLTRANS), ne’e dehan, sira presiza apaleru tanba dalaruma iha kazu asidente balun kauza husi lanu maibe tanba laiha apaleru entaun susar atu identifika.
“Hanesan foin lalais kazu asidente ida ne’ebe maka rezulta ema nain hat mate, ne’e ami rona husi komunidade dehan sira lanu, maibe ami labele justifika tanba laiha apaleru ne’ebe ita labele hatene sira monu ne’e iha situasaun lanu ou la’e,” dehan Komandante Soares, foin lalais, iha Kaikoli,Dili.
Nia dehan, uluk iha UNPOL nia tempu sira oferese duni apeleru ne’e mai iha Polisia Tranzitu Distritu Dili maibe agora at tiha ona no presiza sosa foun.
Problema ne’e nia parte hato’o ona ba iha Sekretariu Estadu Seguransa (SES) uluk kedas maibe to’o agora laiha rezultadu.
Tanba tuir nia, lei mos kriminaliza morista ne’ebe maka lanu lori motor ou kareta, ne’ebe polisia presiza duni ekipamentus ne’e hodi detekta aktu sira hanesan ne’e.
Iha fatin seluk Deputadu Mateus de Jesus katak, governu tenke tau atensaun ba kestaun ne’e, atu nune’e POLTRANS sira servisu ho profesionalismu liu tan.
“Fasilidade hanesan ne’e persija duni atu ne’e bele detecta ema ne’e monu tanba lanu, ou tanba saida, hau hanoin importante no governu persija mos tau matan ba asuntu ne’e” dehan Deputadu de Jesus.
Nia apoia katak, dalabarak asidente ne’ebe maka akontese tanba motorista sira iha kondisaun ne’ebe lanu hela.
