Kazu inan soe bebe ne’ebe akontese fulan Marsu iha area Bebonuk nian, Polisia Servisu Investigasaun Kriminal seidauk identifika autor to’o agora.
Maske nune’e, Diretor Servisu Investigasaun Kriminal (SIK), Superintendente Calisto Gonzaga hateten, prosesu investigasaun kontinua la’o.
“Durante ne’e ita seidauk bolu ema ida, ita seidauk hatene tanba ema soe lakon tiha loron ida loron rua maka ita foin hetan, tanba ne’e ita presiza aguarda,” dehan Diretor SIK, Superintendente Calisto Gonzaga, (10/04), iha Kaikoli, Dili.
Tuir nia, prosesu investigasaun labele ansi no tenke halo investigasaun didiak presiza tempu. “Ita labele halo prosesu ida ho lalais maibe rezultadu laiha, presiza neneik-neneik maibe iha rezultadu,” tenik Diretor SIK ne’e.
Nia dehan, kazu ne’e akontese iha loron Sabadu, 09 Marsu 2013, iha oras tuku sia (09:00 otl) kalan komunidade iha parte Bebonuk, Kampu
Tuti, iha Klinika Sao Miguel nian hetan bebe ida soe hela iha fatin lixu iha fatin ne’eba, entaun komunidade informa kedas ba Polisia.
Tanba prosesu investigasaun agora la’o hela, nia dehan SIK sei servisu hamutuk ho autoridade local sira iha Bebonuk ho Madre sira, atu identifika autor ba kazu soe bebe ne’e.
Iha lidun seluk Deputada Josefa Alvares Soares husu ba komunidade sira atu servisu hamutuk ho polisia nune’e bele identifika autor, tanba bebe ne’e soe kleur ona maka foin hetan.
“Komunidade rasik ne’ebe hela iha fatin ne’eba tenke servisu hamutuk ho polisia sira no ho instansia justisa nian,” Deputada Soares sujere.
Nia mos husu ba polisia atu iha esforsu ne’ebe maka masimu, nune’e bele hetan autor ne’e, tanba hahalok hanesan ne’e la diak, ne’e nudar krimi ida.
