Maske Programa analfabetizasaun implementa desde 2007 e kontinua la’o ate agora, maibe realidade ema barak mak seidauk hatene lee no hakerek, liu-liu ferik-katuas sira bainhira atu simu sira nia osan idozus nian, uza deit liman fuan hodi hanehan (cap jem pol-Indo) surat tahan.
“Ne’e hatudu ba ita momos katak,ita nia populasaun Timor-Leste ne’e seidauk asesu ba iha analfabetizasaun, bainhira simu osan terseira idade nian,sira la asina deit, maibe sira nafatin hodi liman hanehan,” kestiona Sekretariu Jeral Sindikatu Profesores (SPTL), Francisco da Costa Fernandes, (04/07), iha Motael, Dili.
Nia rekonese katak, maske husi SPTL rasik seidauk halo peskiza ida kona ba ida ne’e, maibe liu husi enkontru-enkontru ne’ebe sira halo ho sosiedade sivil sira, liu-liu grupu feto sira, barak mak hakerek naran deit mos la los.
Entertantu Xefe DEpartementu Literasia Analfabetizasaun, Fernanda Gonzaga de Deus, dehan ema terseira idade sira ne’e hatene hakerek, maibe ema ne’ebe servisu iha ne’eba ne’e mak haruka sira hanehan deit.
“Sira mai sira protesta ba ami tanba saida mak ami hatene asina, maibe ami la asina haruka fali ami ba hanehan fali liman,“ hateten Xefe Departementu ne’e.
Enkuantu distritu ne’ebe deklara ona livre husi analfabetu, mak hanesan Distritu Oe-Cusse, Lautem, Manatuto, Manufahi, Aileu, Covalima inklui Distritu Dili, Sub-distritu Atauro.
No Distritu sira ne’ebe mak tuir mai atu deklara tan mak hanesan, Distritu Liquisa, Baucau no Distritu Ermera, hein depois de governu foun.
