Komandu Jerál Polísia Nasionál Timor-Leste (PNTL) envolve membru rua (2) husi Guarda Nacional Republicana (GNR), husi Portugal, iha komisaun rekrutamentu ba kadete foun sira ba tinan 2025 nian atu evita deskonfia sistema familiarismu iha prosesu rekrumentu refere.
“Ita fiar katak iha rekrumentu kadetes foun PNTL tinan 2025 ne’e sei la akontese familiarismu, tanba ita envolve membru GNR iha komisaun,” Komandante Jerál PNTL, Komisáriu Henrique da Costa dehan.
Nia haktuir katak iha rekrutamentu ba kadetes foun 2025 ne’e, ema hotu hakarak katak labele akontese familiarismu nune’e bele fó oportunidade ba joven sira hotu ne’ebé hakarak sai polísia hodi kompete.
Alende ne’e nia dehan, GNR mós sei fasilita formasaun ba kadetes foun sira bainhira pasa ona.
“GNR sei fasilita liuhusi formasaun iha rai-laran nune’e mós rai liur. Sira sei kontribui ba dezenvoliventu rekursu umanu iha PNTL,” nia informa.
Entretantu, Komandante Jerál GNR, Tenente Jenerál Rui Alberto Ribeiro Veloso dehan durante ne’e Komandu PNTL konsidera tebes ezisténsia GNR iha Timor-Leste.
“Ita reforsa nafatin koperasaun ne’e liuhusi hasa’e kualidade membru polísia sira-nian nune’e ba oin bele sai di’ak no profisionál liutan hodi servi povu no Estadu Timor-Leste,” nia hatete.
Iha parte seluk Diretór Ezekutivu Fundasaun Mahein (FM), Nelson Belo, dehan dadaun ne’e rekrumentu ba membru polísia foun nesesáriu tebes hodi koloka ba postu sira, maibé tenke iha rekrutamentu ne’ebé méritu duni no la inklina husi família ka grupu sira, no tenke justu.
“Bainhira iha rekrumentu ne’e murni maka ita sei hetan membru ne’ebé produtivu, inteletual hodi dezenvolve instituisaun PNTL no nia sei la tauk atu halo intervensaun ba kualker kazu sira,” nia dehan.
Alende ne’e nia dehan, labele mós fó kouta ba rejime espesial ka veteranus nia oan, tanba ida-ne’e hatudu ona sistema familiarismu no halo diskrimisaun ba joven sira seluk.
