Komandu Falintil-Forsa Defeza Timor-Leste (F-FDTL) hahú promove militár feto sira hodi lidera instituisaun liuhusi semináriu ne’ebé realiza ho tema “Enkoraja Feto Militár Atu Serbi ho Profesionalismu Konfiansa no Dignidade.
Xefe Estadu Maiór Jerál F-FDTL, Tenente Jenerál Domingos Raúl “Falur Rate-Laek” dehan tempu ona atu feto lidera instituisaun, tanba ne’e Komandu F-FDTL nafatin esforsu hasa’e mentalidade feto militár sira nian iha lideransa.
“Komandu F-FDTL hahú promove militár feto sira, hasa’e sira-nia mentalidade liuhusi partisipasaun ba kualker atividade sira, hodi bele prepara sira-nia abilidade koñesimentu hodi bele lidera instituisaun,” nia hatete.
Nia dehan, papel militár feto iha instituisaun importante hodi kontribui ba dezenvilvimentu iha instituisaun nune’e mós konstrusaun sosiedade ida ne’ebé igual feto nia partisipasaun bele rezolve problema polítiku, sosial no ekonómiku.
“Ita realiza semináriu ida ne’e ho objetivu atu enkoraza feto militár sira atu serbi ho profesionalismu konfiansa no dignidade hanesan baze ida ba preparasaun lidera iha futuru,” Xefe Estadu Maiór Jerál F-FDTL Tenente Jenerál Falur dehan.
“Iha F-FDTL, ita adopta inisiativa sira ne’e fo kbi’it ba feto atu lidera, tanba involve ona iha kontribuisaun makaas ba prosesu paz, tanba ha’u fiar katak feto sira hahú asumi prostura foun paradigma foun, ohin loron knar sira envolve lidera inisiativa sira iha área edukasaun, peskiza, teknolojia, inovasaun no dezenvolvimentu sosiu-ekonomia sira di’ak tebes,” nia hatete.
Nia informa, papél feto nian iha instituisaun F-FDTL ne’e nafatin halo dezenvolvimentu pesoal hodi kontinua ultrapa bareira no nafatin asesu ba formasaun.
“Ha’u hein katak, seminariu ida-ne’e sei sai susesu nu’udar paltaforma ida atu hametin no hamosu ideia foun empoderamentu feto sira-nian, la’ós de’it iha F-FDTL nian, maibé ba mós komunidade ne’ebé sira moris ba,” nia esplika.
Iha fatin hanesan, Deputada husi Komisaun B iha Parlamentu Nasionál, Lídia Norberta dos Santos Martins hatete, feto Timoroan sira-nia partisipasaun ba iha prosesu dezenvolvimentu ne’e importante tebes, tanba prosesu ukun aan mós feto envolve ona no agora iha área dezenvolvimentu feto nia partisipasaun iha setór hotu-hotu.
“Ohin ita mai hamutuk ho feto militár sira, tanba feto nia partisipasaun militár ne’e hahú kedas uluk mai to’o agora. Ita enkoraja sira atu serbí povu no nasaun ho kapasidade ne’ebé sira iha,” nia dehan.
Nia dehan, tuir observasaun ne’ebé iha hatudu katak durante ne’e esforsu boot tebes iha F-FDTL hodi dezenvolve instituisaun liuhusi asegura reprezentasaun envolvimentu feto nian.
“Ita enkoraja para ida-ne’e la’o nafatin ba oin, maibé instituisaun bele haree mós ba situasaun balun ne’ebé dala ruma difikulta sira hodi hala’o sira-nia knaar no papél ba familia, ida-ne’e sai dezafiu ba sira bele hala’o knaar ho di’ak,” nia informa.
Alende ne’e nia dehan, partisipasaun feto iha instituisaun F-FDTL ne’e hahu mudansa ona, maibé ba oin husu nafatin atu aumenta feto ba kargu xefia sira nune’e bele halo komparasaun ba igualdade jéneru.
