Durante ezisténsia Falintil-Forsa Defeza Timor-Leste (F-FDTL) ba tinan 24, foin iha feto na’in rua (2) mak assume kargu ofisial ka xefia.
Xefe Estadu Maiór Jerál F-FDTL, Tenente Jenerál Domingos Raul “Falur Rate-Laek” dehan, total feto militár ne’ebé durante ne’e servisu hamutuk ho militár mane sira iha instituisaun F-FDTL hamutuk na’in 276.
“Durante ezisténsia F-FDTL tinan 24 ona, iha feto na’in 276 mak sai militar, husi ne’e iha militár feto na’in rua (2) ida (1) mak sai Kapitaun no ida (1) sai Tenente, seluk husi ne’e soldadu no sarjentu,” nia dehan.
Nia dehan, militár feto na’in 2 refere ida okupa kargu Xefia Jender iha F-FDTL no ida tan Xefe Administrasaun.
“Maske feto menus iha instituisaun, maibé durante ne’e ita haree partisipasaun militár feto sira di’ak tebes iha sira-nia kareira,” Tenente Jenerál Falur Rate Laek hatete.
Nia dehan, partisipasaun feto iha militár ne’e importante tebes, envolvimentu feto hahu kedan husi uluk mai to’o ohin loron, maske sei menus maibé kobre ba área hotu.
“Ha’u hanesan lideransa militár nafatin dezenvolve militár feto sira-nia mentalidade no kapasidade nune’e sira bele servisu hamutuk di’ak liután ho mane sira,” nia hatete.
Nia hatete, envolvimentu feto sira fundamentál tebes no determinante ba dezenvolvimentu instituisaun F-FDTL.
Entretantu, Deputada Lídia Norberta do Santos Martins dehan, partisipasaun feto iha militár uluk mai to’o agora.
“Ita haree esforsu boot ne’ebé instituisaun halo mak liuhusi asegura envolvimentu feto iha F-FDTL ne’e di’ak. Ita enkoraza atu bele la’o nafatin ba oin. Ita hotu hatene katak feto Timor-Leste ne’e partisipasaun ba prosesu dezenvolvimentu ne’e importante tebes, inklui militár,” nia dehan.
