Membru Parlamentu Nasionál husu governu atu aumenta subsídiu pulsa ba xefe aldeia sira hodi bele fasilita sira-nia servisu iha terenu.
Deputada Sancha Tilman dehan, xefe aldeia iha teritóriu laran ne’e kada fulan tolu (3) hafoin simu sira-nia subsídiu ne’e sira dehan iha buat, maibé tenke aumenta mós ho subsídiu pulsa nian, tanba durante ne’e sira uza rasik osan hodi sosa pulsa kontatu ho komudade bainhira akontese problema ruma, ka atu kria enkontru ruma.
“Ita husu ba governu atu aumenta subsídiu pulsa ba xefe aldeia sira hodi apoiu servísu iha terenu,” nia hatete.
Nia hatete, governu kria polítika ida atu bele fó subsídiu komunikasaun pulsa ba sira para sira bele halo kontatu ho komunidade sira,” nia hatete.
Nia dehan, Timor-Leste ne’e ema hotu hatene, bainhira atu kontatu komunidade sira hodi hasoru laos atu tur de’it hodi atende situasaun sira.
“Tanba kada fulan tolu sira simu sira-nia osan subsídiu dala ida, tanba ne’e mak sira sujere atu husu ba ministériu kompetente para atu bele haree asuntu sira-ne’e,” Deputada Tilman dehan.
Entretantu Vise-Ministru Asuntu Parlamentar Aderito Hugo hatete, subsídiu insentivu ba xefe aldeia no xefe suku sira liuhusi konsellu PNDS atu iha kompeténsia ba obra sira ne’ebé mak iha.
“Tanba dezempeñu suku nian, kuandu aumenta subsídiu, maibé atividade servísu iha sede suku nian hanesan nafatin karimbu tau iha pasta laran lori lao ba lao mai, ema presiza karimbu tenke ba buka xefe suku ba iha nia natar ka ba to’os ne’e mak ita tenke haree,” dehan nia.
Nia dehan, MAE tenke halo observasaun no superviziona sériu suvensaun sira husi orsamentu estadu nian ne’ebé aloka ba suku sira, tanba tuir loloos aumenta subsídiu sira-ne’e dezempeñu suku sira ne’e di’ak liutan mais, tanba situasaun ne’ebé akontese mak sei nafatin hanesan.
