Hahú loron 8 too 25 fulan Novembru tinan 2024, Autoridade Protesaun Sivíl (APC) rejistu kazu komunidade uma-kain 46 mak afetadu ba dezastre naturais.
“Kazu dezastre hamutuk 46, husi númeru ne’e anin sobu ita-nia komunidade nia uma 5, ahi-han uma 26, bee tama uma 15,” hatete Xefe Sesaun Relasaun Externa, iha Autoridade Protesaun Sivíl (APC) Nasionál, Nelson Nunes de Orleans, iha Caicoli, Díli.
Nia dehan, komunidade nia uma hamutuk 15 ne’ebé, bee tama no sobu nune’e apoiu de’it sasan emerjénsia ba sira. no númeru ema ne’ebé afetadu 3, no uma kain 5 maka prense ona kriteria.
“Ita haree iha munisípiu Ainaro ahi han uma ida, munisípiu Atauro anin sobu uma 3, munisipiu Díli ahi han uma 23, Bobonaro anin sobu uma ida no bee tama hodi sobu uma iha 15, munisípiu Manatuto anin sobu uma ida no ahi han uma rua,” nia esplika.
Nia informa, Komando APC munisípiu ho parseiru relevante sira fornese asistensia emerjensia ba familia afeitadu sira ne’ebé sai vitima ba dezastre naturais.
Iha fatin seluk, Reprezentante Prezidente Autoridade Munisípiu (PAM) Ainaro, Ruivo Barros Magno dehan, iha munisípiu Ainaro akontese dezastre naturais iha postu 4, maibé hetan ona apoia emerjénsia husi APC no Administrasaun munisípiu Ainaro nian.
“Iha Ainaro dezastre akontese iha postu administrativu haat, maibé postu administrativu tolu mak hetan ona apoiu emerjénsia no tuir mai sei apoiu tan postu ida hodi kompleta tan dadus postu 4 munisípiu Ainaro nian, apoiu ne’e konjunta husi APC no administrasaun munisípiu nian, ” informa.
Nune’e mós, Vitima ba Dezastre Naturais Olinda Moniz esplika, sira-nia uma anin sobu iha semana kotuk maibé hetan ona apoiu emerjénsia husi Governu.
“Ami hetan nesisidade báziku husi ita-nia governu, no sira mai foti ona dadus atu kontinua apoiu ou lae, tanba ne’e ami hein de’it,” nia afirma.
