Ministériu Solidaridade Sosial no Inkluzaun (MSSI) Diretór Nasional Pesoas Portadora Defisiénsia Domingos Henrique Maia hateten, MSSI entrega hikas ona ema moras defisiénsia nain atus ida hitu nulu resin sia (179) ba família sira ho kondisaun ne’ebé di’ak.
“Ema moras mentál na’in-179 ne’ebé Ministériu Solidaridade Sosial no Inkluzaun foti hodi halo tratamentu ne’e maioria di’ak hotu ona, tanba n’e ita entrega hikas ona ba família sira ho kondisaun ne’ebé di’ak,” dehan Diretór Nasional Pesoas Portadora Defisiénsia Domingos, iha Kaikoli, Díli.
Nia hatutan, ema difisiente mentál sira-ne’e MSSI hetan foti sira lori ba halo tratamentu iha instituisaun sira ka ba Ministériu Saúde, MSSI nia servisu mak buka hodi halo tratamentu bainhira di’ak ona, lori hikas ba entrega ba família sira.
“Ministériu Solidaridade Sosial no Inkluzaun nia servisu mak oinsa buka hatene no identifika ema moras mentál sira no buka tuir família sira atu oinsa bele ita bele lori ema moras mentál sira ne’e ba halo tratamentu iha fasilidade saúde sira.
Ita hatene katak atu halo tratamentu ba ema ne’e servisu Ministériu Saúde nian, ami-nian mak buka no lori mai entrega iha instituisaun sira hodi halo tratamentu, bainhira di’ak ami ba foti hodi ba entrega hikas ba família sira,” nia esplika.
Iha fatin hanesan Diretór Nasional Prevensaun Kontrolu Doensas Florindo Pinto hateten, durante ne’e Ministériu Saúde kolabora ho MSSI hodi halo verifikasaun ba ema moras mentál sira ne’ebé lao iha dalan ninin.
“Ami servisu hamutuk ho Ministériu Solidaridade Sosial no Inkluzaun hodi halo verifikasaun ba ema moras mentál sira no MSSI halo koordena ho família sira atu nune’e bele lori pasiente moras mentál sira-ne’e ba halo taratamentu,” nia dehan.
Nia hatutan, atividade tratamentu ba ema moras mentál sira-ne’e lao babain, iha munisípiu sira, tanba MS halo kooperasaun di’ak ho instituisaun sira no organizasaun sira hanesan Klibur Domin no Saun João de Deus Laclubar hodi fó tratamentu ba ema moras mentál sira-ne’e to’o di’ak.
“Ita iha kooperasaun di’ak ho instituisaun sira no organizasaun hanesan Klibur Domin no Saun João de Deus Laclubar lao di’ak, dala ruma sira hetan pasienta sira-ne’e direita husi munisípiu dalaruma mós sira hetan husi Ministériu Saúde, tanba ne’e bainhira ami halo taratamentu ba pasiente sira-ne’e di’ak ona ami entrega hikas ba sira-nia família,” nia salienta.
