Sentru votasaun hamutuk 696 mak konfirma preparadu hodi fasilita elisaun jeral prezidensial ne’ebe sei hala’o iha fulan Marsu tinan ne’e (2017) nia laran.
Diretor Jeral Sekretariadu Tekniku Administrasaun Eleitoral (STAE), Acilino Manuel Branco hateten sentru votasaun 696 ne’e kompostu husi rai laran iha 693 no tolu seluk iha estrangeirus, ida iha Australia no ida iha Portugal.
Nia dehan, iha rai laran sei uza eskola publiku sira sai sentru votasaun tanba sei iha 941 estasaun votu iha rai laran.
Nia hatutan, iha Australia sei konsentra iha Darwin no Sydney. Portugal iha Lisboa.
“Agora dadaun brigada sira halo hela sosializasaun kona ba data elisaun ba komunidades no espozisaun lista votantes iha suku laran, atu sira ne’ebe naran sala bele hadia antes tama ba elisaun,” nia hateten iha servisu fatin Kaikoli, Dili.
Nia hatutan, material balun sira halo ona distribuisaun ba iha munisipio sira la inklui vuletin de votus.
Nia informa, sira mos hetan ona kontaktu ho organizasaun international balun husi Australia no Uniaun Europeia hodi halo observasaun ba prosesu elisaun prezidensial no parlamentar iha tinan ida ne’e.
Enkuantu total eleitores ne’ebe sei tuir elisaun tinan ne’e hamutuk 740 mil resin iha rai laran no iha estrangeirus 1300 resin.
Elisaun prezidensial sei hala’o simultania tantu rai laran no liur iha dia 20 fulan Marsu. Iha rai liur depende ba iha oras local husi nasaun sira.
Iha parte seluk, Primeira Dama Isabel Fereira, husu joven sira atu nafatin kalma durante prosesu kampania to’o rezultado sai.
“Joven mak potensial ba konflitu, tanba sira joven, sira nia ran manas lalais entaun ita hanoin importante atu fahe informasaun ba joven sira atu sira kalma iha kampania no simu rezultado ho rasional,” nia hateten iha seminario nasional kona ba paz, justisa, toleransia hodi hametin independensia nasional, iha Sentru Konvensaun Dili.
Nia dehan, iha tinan 2007 mosu elisaun ida ne’ebe ho tensaun aas, konflitu no violensia maka’as iha rai laran no lataka dalan mos atu situasaun sira ne’e mosu fali tinan ne’e, tanba ne’e importante atu fo hanoin ba ema hotu liu –liu joven sira.
“Ita nasaun ki’ik ho povu maioria kiak no lamatenek, maibe iha maturidade, ida ne’e mak halo ita deferensia ho mundu,” nia hateten.
