Aktividades prostituisaun ne’ebe dadaun ne’e buras iha rai laran, liu-liu involve ema estranjeirus, tanba tuir Membru Parlamentu Nasional, Deputadu Aderito Hugo, katak sistema kontrolu husi Polisia Imigrasaun mak sei fraku.
Deputadu Hugo hato’o kestaun ne’e relasiona ho kazu prostituta nain 49 husi Cina ne’ebe foin lalais (6/10/14) Polisia Imigrasaun kaptura tanba hala’o aktividade prostituisaun iha Romens Bar, My flower Bar, Pioni Hotel, no New Oriental Hotel.
“Sira mai ho visa turista, ita la konsege halo identifikasaun, katak sira mai halo saida? Hanesan ita ba ema nian rai deit ema litik ita, hodi husu tuir objektivu visita,” Deputadu Hugo hateten, iha Parlamentu Nasional.
Tuir nia, lolos Polisia Imigrasaun evita antes ona iha aero portu, wainhira haree no diskunfia ema ne’e nia hahalok.
“Imigrasaun duni kedas, kuandu ema mai ho intensaun la los,” Deputadu Hugo sujere.
Nia mos sujere ba Polisi Imigrasaun, tenke iha data base nune’e bele kontrolu wainhira ema mai ho visa turista 30 dias, no liu husi ne’e seidauk fila, Polisia tenke buka tuir.
Kona ba sistema kontrolu husi Polisia Imigarasaun sei fraku, Inspector Xefe Polisia Imigrasaun, Luis Barreto, rejeita deklarasuan ida ne’e, tanba durante ne’e sira hala’o duni sira nia servisu ho masimu no implementa tuir lei ne’ebe vigor.
“Loron-loron ami kaer hela deit ema ne’ebe halo prostituisaun, total prostituta husi Janeiru to’o Outubru 2014 hamutuk ema nain 1737,” Inspector Xefe Polisia Imigrasaun Barreto hateten.
Nia hatutan, hafoin polisia imigrasaun kaptura haruka sira tuir prosesu investigasaun no balun selu taxa no deporta fali ba sira nia rain, no balun ne’ebe halo krimi todan, hatama ba prizaun iha Timor-Leste.
Nia dehan, tuir lei no. 8/2013 sidadaun estrangeiru iha direitu atu mai iha Timor-Leste kuandu tuir prosesu ne’ebe legal, maibe kuandu loron determinasaun hotu mak sei iha ne’e nafatin no halo aktividade nebe kontra lei antaun polisia imigrasaun iha dever hodi kaptura no halo prosesu legal hasoru sira.
“Lei la fo dalan atu ami intervista fali ema iha aero portu no duni ema arbiru, ” nia hateten.
Kona ba prostituta 49 husi Cina ne’e, nia dehan prosesu investigasaun la’o hela, depois mak foti desizaun tuir lei imigrasaun nian.
Iha biban seluk, reprezentante grupu feto, Filomena Reis, hateten presiza duni minimiza aktividades prostituisaun iha rai laran no ida ne’e papel polisia nian.
“Hau fo hanoin, liu -liu ba feto Timor sira tenke respeita aan, tau ita nia an ho didiak,” Reis sujere.
