Organizasaun Search For Common Ground (SFCG) apoia fundus ba grupo jovens 17 husi distritu sia, hodi loke sira nia negosiu ki’ik no motiva sira sai emprezariu ne’ebe diak no susesu iha futuru.
Country Director SFCG, Jose Francisco de Sousa, hateten programa fundus ki’ik ne’e ho objetivu fo oportunidade ba grupo joven sira atu hala’o aktividades ruma tuir sira nia nesesidade iha distritu.
“Ita koko fo oportunidade ba joven sira aprende halo negosio ida diak ,” Diretor Sousa hateten, iha lansamentu programa ‘drama radio karau dikur ba dame’ iha salaun UNDIL, Dili.
Grupo Jovens 17 husi distritu sia ne’e mak distritu Dili, Baucau, Ermera, Liquica, Oe-Cusse, Bobonaro, Manatuto, Suai no distritu Manufahi.
Ba faze primeiru, nia dehan, kada grupo sei hetan fundus ho montante $2,000 no sei loke tan faze segundu ba distritu sira seluk atu apply.
Antes ne’e nia hateten, SFCG servisu hamutuk ho Instituto de Apoio ao Dezenvolvemento Emprezarial (IADE) fo kapasitasaun ba grupo joven sira, nune’e bele iha konesementu no bele identifika negosio ne’ebe neserario ba sira.
Aktividade emprezarial ne’ebe grupo 17 ne’e sei dezenvolve, mak hanesan kooperativa hakiak fahi macau, produsaun aihan local, alfaiate, kreditu union no fa’an café uut, kursu komputador, souvenir bamboo, viveiros ba ai parapa, rental, photografia, arte e teatro no musika tradisional, produs lixu sai kreatividade hafolin, soru tais no seluk tan.
Iha parte seluk, Prezidente Konselho Nasional Joventude Timor –Leste (CNJTL), Leovegildo da Costa Hornai, hateten programa ne’e positive tebes atu promove partisipasaun grupo joventude sira nian iha prosesu dezenvolvementu liu husi aktividade fila liman sira.
Hornai mos husu ba grupo joven sira ne’ebe hetan fundus ida ne’e atu nafatin iha komitmentu, hodi ezekuta osan ki’ik ida ne’e ho responsabilidade nune’e bele fo benefisio ne’ebe bo’ot ba sira nia familia no ba jovens sira seluk.
“Mesmu ki’ik, maibe kuandu hala’o didiak nakonu ho komitmentu no honestidade, bele hetan rezultado ne’ebe bo’ot no sei fo mos benefisiu ba joven sira seluk inklui komunidade sira,” nia hateten.
