Agensia Internasional UNFPA liu husi Sekretaria Estado ba Promosaun Igualidade (SEPI) apoia $161,000 ba NGO local lima, hodi hala’o atividade fo asistensia ba vitima violensia domestika inklui sosializa lei kontra violensia domestika ba komunidades.
Reprezentante UNFPA iha Timor-Leste, John M. Pile, hateten hahu iha 2003 to’o agora UNFPA nafatin iha komitmentu apoia governu Timor –Leste, promove igualidade jeneru no partisipasaun feto iha prosesu demokrasia,liu –liu eliminasaun violensia domestika ne’ebe afeta ba feto sira nia moris.
“UNFPA supporta NGO lima ne’ebe fo asistensia ba vitima violensia bazeia ba jeneru hodi asesu ba iha saude, uma mahon, counseling no apoia legal hodi asesu ba mediku,” M Pile hateten, iha salaun Maria Tapo, Kaikoli, Dili.
Aleinde nia dehan, UNFPA mos fo ona formasaun kapasitasaun kona ba komputador, Ingles,life skills no treinamentu vokasional seluk tan ba vitima violensia domestika no violensia bazeia ba jeneru kuaze ema 350 resin.
NGO local lima ne’ebe hetan apoia ne’e mak hanesan AlFeLa, PRADET, Casa Vida, FOKUPERS, no Uma Mahon Salele.
Entretantu Sekretaria Estado ba Promosaun Igualidade, Idelta Maria Rodrigues, hateten apoia ida ne’e la’os primeira vez, maibe kontinuasaun husi apoia ne’ebe iha ona iha governu anterior ba atividdae prevensaun violensia domestika.
Nia husu ba NGO sira atu nafatin esforsu an hadia linha kordenasaun ho governu tanba governu iha komitmentu atu kombate violensia domestika iha rai laran.
“Hau husu ita bo’ot sira nia komitmentu atu iha akuntabilidade ne’ebe diak no responsabilidade ba annual workplan ne’ebe ohin ita asina ho UNFPA,” SE Rodrigues sujere.
Aleinde ne’e, nia dehan, SEPI mos tinan ida ne’e tau osan $300,000 ne’ebe sei fahe ba NGO local sira, atu hala’o atividade prevensaun no sosializasaun lei kontra violensia domestika ba komunidade iha teritorio tomak.
Iha fatin hanesan reprezentante Uma Hakmatek Casa Vida, Domingas Soares preokupa oituan ho sistema ne’ebe iha, tanba iha 2013 apoia ne’ebe sira simu UNFPA liu husi SEPI transferensia fundus ba fulan neen nian deit.
“Ami seidauk bele fo komentario, tanba ami seidauk asina buat ruma,” Koordenadora Soares hateten.
