Membru Parlamentu Nasional preokupa tebes ho implementasaun kurikulu foun iha eskola Ensino Sekundariu sira, tanba laiha sosializasaun ne’ebe adekuada, antes implementa.
“Sira halo mudansa ba kurikulu maibe laiha sosializasaun,” Deputadu Eladio Faculto proekupa, iha Parlamentu Nasional.
Tanba ne’e, nia husu ba Ministeriu Edukasaun tenke distribui livru manuais ba eskola sira, atu nune’e estudante sira bele lee.
Iha fatin hanesan Deputadu Cesar Valente de Jesus, hateten livru historia rezistensia nian presiza hatuur iha kurikulu ne’e, atu nune’e estudante sira hatene diak liutan kona ba historia Timor nian.
“Hanesan ezemplu, bainhira hau husu hau nia oan; Ministeriu Edukasaun nia naran saida, maibe nia la hatene,” Deputadu de Jesus hateten.
Nia dehan, ne’e hatudu katak edukasaun kona ba historia Timor nian seidauk masimu, tanba Ministriu Edukasau nia naran deit alunus la hatene.
Hatan ba kestaun ne’e Ministru Edukasaun, Bendito Freitas, katak revizaun ba kurikulu ensino baziku presiza halo duni, tanba bazeia ba lei juridiku estabelesementu integradu ba ensino baziku ninian.
“Tanba saida mak tenke halo revijaun ba kurikulu ne’e, tanba presizamente atu koloka ita nia valores nasionais espesialmente iha materia historia,”Minstru Freitas hateten.
Nia hatutan, iha tempu badak ministeriu sei halo revizaun ba kurikulu, atu nune’e estudante sira bele hatene kona ba historia Timor nian.
“Ne’e hanesan objetu importante atu loke dadaun ona konsiensia nasional ba jerasaun foun, ita nia oan sira bele hatene no hodi moris tuir,” nia hateten.
