Polisia Nasional Tranzitu konsege prende kareta estadu hamutuk 26, durante fulan Julhu 2013 nia laran, tanba uja la tuir regras (uja ba privadu) ne’ebe governu determina ona.
Komandante Polisia Nasional Tranzito (POLTRANS), Inspektor Xefe Antonio L.C Soares, hateten kareta hirak ne’e prende, tanba balun uja ba shoping no balun mos laiha karta autorizasaun husi ministeriu relevante atu hala’o servisu iha loron feriadu (Sabado no Domingo).
“Ami halo operasaun ne’e fahe ba linha rua, pertama iha Tasi tolu no ida fali iha Becaora nian, balun lori kareta ne’e laiha karta kondusaun no balun laiha karta autorizasaun, e sira uja ba interese privadu,” Komandante Soares dehan, iha Kaikoli,Dili.
Nia hatutan, kareta estadu hirak ne’e husi Ministeriu Agrikultura, Ministeriu Justisa, Ministeriu Publiku no balun husi Ministeriu Torismu nian.
“Sira tenke selu multa husi dolar sia to’o $45,” Komandante Soares katak.
Nia dehan, POLTRANS prende kareta sira ne’e bazeia ba rezoluzaun ne’ebe maka Primeiru Ministru hatun ba Komando polisia nian.
Iha lidun seluk Deputadu Francisco Branco, hateten ne’e polisia nia knar no sira hala’o sira nia papel ho diak.
“Maibe ne’e la’os polisia deit maka responsabilidade, governu mos tenke tegas, tenke iha konsiensia oinsa maka bele kumpri regras ne’ebe iha,” Deputadu Branco hateten.
Iha parte seluk komunidade Leonel Gomes, rekonese katak dala ruma iha loron Sabado ho Domingo kareta estadu sira ne’e la’o ba distritu no iha capital dili, maibe komunidade la hatene katak ne’e sira halo hela sira nia servisu ou uja interese privadu.
“Polisia maka tenke forsa atu implementa regulamentu ne’ebe maka trasa ona,” Gomes katak.
