Governu Australia iha komitmentu bo’ot atu kontinua fo apoia ba estadu Timor-Leste iha areas defisientes inklui mos redus violensia bazeia ba jeneru, hodi promove igualidade jeneru iha rai laran, iha future.
Vise Ministru Solidaridade Sosial (MSS), Jacinto Rigoberto, rekonese katak apoia governu Australia ajuda tebes hodi tau matan ba ema defisientes no vitima violensia bazeia ba jeneru, liu-liu promove sira nia direitu iha setor hotu.
“Ho vizita Ministra Dezenvolvementu Internasional mai Timor-Leste, hatudu katak Australia iha komitmentu as atu kontinua suporta Timor –Leste, liu –liu iha area defisiente no violensia bazeia ba jeneru,” Vise Ministru Rigoberto dehan, hafoin akompanha Ministra Dezenvolvementu Internasional Australia, Melissa Parke halo vizita ba organizasaun PRADET no Sentru Rehabilitasaun Nasional (CNR), iha Dili.
Nia dehan, hahu husi tinan 2002 to’o agora governu Autralia liu husi programa ETCAS fo ona apoia finanseira ba area violensia bazeia ba jeneru kuaze $1.6,000,000, inklui mos apoiu ba Assert hodi produs ain falsu ba ema ho defisiente sira kuaze $40,000 resin.
Vise Ministru ms promote, katak dadaun ne’e governu prepara hela atu ratifika konvensaun direitu ema defisientes nian, tanba povu Timor –Leste ema ho kondisaun defisiente barak.
Iha fatin hanesan, Ministra Dezenvolvementu Internasional Australia, Melissa Parke, hateten nudar nasaun vizinu importante tebes atu vizita malu hodi hare besik nesesidade Timor –Leste nian, nune’e apoiu sira ne’ebe Australia fo mos tuir prioridade ne’ebe Timor –Leste iha no presiza.
Ministra Parke rekonese,katak hanesan mos iha Timor-Leste, iha Australia difisil mos ba ema defisiente atu asesu ba iha publiku, pior liu husi familia kiak.
Tanba ne’e nia dehan, governu no ema hotu iha obrigasaun atu ajuda, involve sira iha dezenvolvementu, tanba programa no asistensia dezenvolvementu sei la efetivu bainhira la involve ema ho defisientes.
“Hau kontente tebes bainhira rona Vise Ministru, dehan governu iha komitemtu bo’ot atu promove no involve ema ho defisiente foti desizaun no nia mos, dehan governu iha planu atu asina konvensaun direitu ema ho defisientes nian, hau hanoin ida ne’e pasu ne’ebe positive tebes ba governu Timor –Leste,” Ministra Parkes kontente.
Governu Australia, nia hatutan, dadaun ne’e prepara hela prosesu nomeasaun ba embaixador ba dezenvolvementu inklusivu ne’ebe sei tau matan espesifiku ba ema defisiente hodi garantia sira nia lian, ema hotu rona inklui mos enkoraja doadores sira atu fo atensaun ba problema ne’e.
Iha parte seluk, Diretor Ezekutivu Sentru Rehabilitasaun Nasional, Rui Manuel Exposto, agradese ba Ministra Parke ne’ebe vizita ona sira, hodi hare no rona direitamente difikuldade ne’ebe sentru ne’einfrenta, tanba governu Australia nudar doadores ba sentru ne’e.
“Sira mos fo ajuda ami liu husi AusAid, hanesan kadera roda, entaun sira hakarak hare ami nia servisu ne’e to’o iha ne’ebe,” Diretor Exposto katak.
