Durante fo asistensia legal ba vitima abuzu seksual ba minoridade (14 anos) sira hamutuk 288 kazus husi organizasaun Asistensia Legal ba Feto no Labarik (AlFeLa), iha ona kazu 49 mak hetan ona nia finalidade iha tribunal hafoin liu husi prosesu ne’ebe naruk.
Diretora AlFeLa, Marcelina Correia, hateten dala ruma desizaun ne’ebe foti ne’e diak, tuir duni lei ne’ebe vigora ona iha rai laran, maibe dala ruma mos ladun adekuadu tanba ne’e desizaun depende ba evidensia ne’ebe iha.
“Hanesan foin lalais kazu insestu iha distritu Lospalos Tribunal Distrital Baucau fo pena ne’e as 16 prizaun ne’e pena ne’ebe as liu, tanba nia halo insestu ba nia oan feto nain rua, kazu insestu seluk mos hetan 16,” dehan Diretora Correia, Iha nia knar fatin Vila Verde, Dili.
Total kazu ne’ebe AlFeLa fo ona asistensia ba vitima sira husi tinan 2008 to’o Julhu 2013, hamutuk 288 kazus, kompostu husi distritu Aileu kazu walu (8), Ainaro kazu violensia domestika hat (4), abuzu seksual 17 kazus, Baucau hamutuk 33 kazus, kompostu husi violensia domestika rua (2) abuzu seksual 31, iha kazu ida mak arkiva iha polisia tanba moras mental, ida rekorbe iha tribunal rekursu, 27 kazus mak registu iha ministerio publiku tanba evidensia la forte no la hatene vitima nia paraderu, kazu tolu vitima lakohi atu kazu lao ba oin, kazu ida taka husi tribunal tanba arguido mate, 49 mak prosesu remata hetan pena prizaun, 38 kazu registu iha tribunal, 106 kazu iha tribunal distrital hat.
Alem de fo asistensia legal ba vitima violensia bazeia ba jeneru, sira mos fo asistensia legal no akompania vitima ne’ebe defende an sai fali arguido iha tribunal tanba sira defende an.
“Ami mos iha ona kolega nain rua ne’ebe hetan ona kualifikasaun husi sentru formasaun judicial entau ami agoara bele halo letigasi iha Tribunal bainhira vitima defende an sai fali arguida ami iha knar atu fo asistensia,” dehan Nia.
Iha parte seluk, Koordenadora Uma Mahon Forum Komunikasaun Feto Timor –Leste (FOKUPERS), Judith Ribeiro, hateten hahu iha tinan 2007-2012 sira fo ona asistensia ba vitima violasaun seksua l no insestu ba minoridade hamutuk nain 84 hela iha uma mahon hodi halo rehabilitasaun.
Nia hatutan, tuir kazu ne’ebe shelter FOKUPERS simu, barak liu mai husi distritu Ermera no Liquisa, enkuantu simu husi parseirus hanesan ALFeLa, JSMP, Polisia VPU, lideransa local no vitima rasik mak ba iha uma mahon.
“Iha kazu balun mak ho idade 12 balun mos ema adulto idade 40 mai kraik,” Koordenadora Ribeiro katak.
Entretantu, senior project officer ba asuntu justisa no bein star, Cipriano das Neves, rekonese katak iha duni kazu violasaun seksual ba labarik feto minoridade sira, maibe to’o agora seidauk iha dadus ne’ebe organizado tanba prezensa sosiedade sivil sira ne’ebe fo atensaun ba situasaun labarik ladun barak.
Nia hatutan katak oras ne’e dadaun iha labarik lubuk ida mak hela iha uma mahon tanba vitima abuzu seksual ne’ebe autor balun mai husi familia rasik.
“Ami nia monitorizasaun iha area remotas sira ne’e ami identifika kazu balun hanesan situasaun ekonomia afeta labarik sai vitima ba abuzu sira hanesan abuzu fisiku no seksual,” dehan Nia.
Nia informa katak violensia abuzu seksual ba minoridade barak liu mak akontese iha distritus Oecusse, Viqueque, Aileu, Ermera no seluk tan.
